ގުރުއާނާ ސުންނަތުން ސާބިތުވާ، އިސްލާމް ދީނުގެ އަސާސަކާމެދު ޝައްކު އުފައްދައިގެން ނުވާނެކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"އަލްޚުލަފާއުއްރާޝިދޫންގެ ޙަޔާތްޕުޅުން ދަރުސްތަކެެއް" މި މައުޟޫއަށް ޚާއްސަ ކުރެވިގެންދިޔަ މިއަދުގެ ޚުޠުބާގައި ވިދާޅުވީ އިސްލާމްދީނާމެދު ޝައްކާއި ވަހުމުތައް އުފައްދާ ފަތުރަމުންދާ މިޒަމާނުގައި އަބޫބަކުރުފާނު ދެއްކެވިފަދަ ސާބިތުކަމެއް ދައްކާންޖެހޭ ކަމުގައެވެ. އެގޮތުން މީހަކު އެމީހެއްގެ ކޮށި ވިސްނުން ހުއްޖަތަކަށް ހަދާ، މުސްލިމުންގެ ސިކުނޑި ދޮވެލުމަށްޓަކާ ދައްކާ ވާހަކައަކުން ގުރުއާނާ ސުންނަތުން ސާބިތުވާ، އިސްލާމްދީނުގެ އަސާސަކާ މެދު ޝައްކު އުފައްދައިގެން ނުވާނެކަމަށްވެސް ޚުޠުބާގައި ވިދާޅުވެފައި ވެއެވެ.
މުސްލިން އަޚުންނޭވެ! އަބޫބަކުރުގެފާނަކީ ހެޔޮ އަމަލު ކުރެއްވުމަށް ނުހަނު ލޯބިކުރައްވާ ބޭކަލެއްކަން މި ހަދީސުން އެނގެއެވެ. ހެޔޮ ކޮންމެ ކަމެއް ކުރެއްވުމުގައި އެކަލޭގެފާނު ކުރި ހޯއްދަވައެވެ. މާތް ނަބިއްޔާގެ އިސްރާއާއި މިއުރާޖުގެ ހާދިސާގެ ޚަބަރު އެކަލޭގެފާނަށް ލިބިވަޑައިގަތުމުން ވިދާޅުވި ބަސްފުޅުން އެކަން ދޭހަވެއެވެ. ބާރަށް ދުވާ އަހުގައި އެތައް ދުވަހަކުން ކުރެވޭ ދަތުރެއް މާތް ނަބިއްޔާ ކުޑަ ހިނދުކޮޅެއްގެ ތެރޭނ ނިންމަވާލައްވައި، ހަމަ އެ ދަތުރުފުޅުގައި އުޑުތަކަށް އަރާވަޑައިގަތް ޚަބަރު ގަބޫލުކުރައްވަން ބައެއް ސަހާބީންނަށް ދަތިފުޅު ވިއެވެ. އެހެންނަމަވެސް މައްކާގެ މުޝްރިކުން މާލާމަތުގެ ރާގެއްގައި އަބޫބަކުރުފާނުގެ އަރިހުގައި ކަލޭގެފާނުގެ އެކުވެރިޔާ މިފަދައިން އެބަ ހަދީސް ކުރައްވައޭ، ކަލޭގެފާނު އެވާހަކަ ތެދުކުރައްވަންތޯއޭ ދެންނެވުމުން އެކަލޭގަފާނުގެ ޖަވާބަަކަށް ވީ ސިޔަރަތުގެ ރަން އަކުރުން ލިޔެވިފައިވާ އަނަންނިވި ބަސްފުޅެކެވެ. "އާނއެކެވެ. އަހުރެން އެވާހަކަ ތެދު ކުރަމެވެ. އަހުރެން މިހިރީ ތިޔަށްވުރެ މާ ބޮޑެތި ކަންތައްތައް އެކަލޭގެފާނާބެހޭގޮތުން ތެދު ކޮށްގެންނެވެ. އެހެނީ ހެނދުނާއި ހަވީރު އެކަލޭގެފާނުގެ އަރިހަށް އުޑުގެ ޚަބަރުތައް (އެބަހީ ވަޙީ) އަންނަކަން އަހުރެން މިހުރީ ތެދު ކޮށްގެންނެވެ."
ޚުޠުބާގައި ވިދާޅުވެފައި ވެއެވެ.
މިއަދު ޚުޠުބާގައި ވިދާޅުވީ ދީނުގެ ޚަލީފާއިން ފަދައިން އެންމެހާ މުސްލިމުންނަކީވެސް އިސްލާމީ ރިވެތި ސިފަތައް އަަށަގެންފައިވާ، މުޖުތަމައަށް މަންފާކުރުވަނިވި ބަޔަކަށް ވުމަކީ މުހިންމު ކަމެއް ކަމުގައެވެ.
