މަކަރާއި ހީލަތުން ފައިސާ ހޯދުމުގައި ފުލުހަކު ބައިވެރިވާ ކަމަށް ސޯޝަލް މީޑިއާގައި ފެތުރެމުންދާ ވާހަކަތަކަކީ ދޮގު ވާހަކަތަކެއް ކަމަށް ފުލުހުންގެ މުވައްސަސާއިން ބުނެފައެވެ.
މި މައްސަލައަކީ މީހެއްގެ ވައިބާ އެކައުންޓް ކޮމްޕްރޮމައިޒްވެ، އެ މީހާގެ ދަންނަ މީހުންނަށް މެސެޖު ކޮށްގެން އޮޅުވާލައިގެން ފައިސާ ހޯދާފައިވާ މައްސަލައެއް ކަމަށް ފުލުހުން ބުނެއެވެ. އަދި މި މައްސަލައާ ގުޅުންހުރި އިތުރު ތިން މައްސަލައެއް މިހާރު ތަހުގީގު ކުރަމުންދާ ކަމަށް ފުލުހުން މައުލޫމާތު ދެއެވެ.
ފުލުހުން ބުނާ ގޮތުގައި މައްސަލަ ހުށަހެޅުމާއެކު ވައިބާ އެކައުންޓު ރިކަވާކޮށް، އެ އެކައުންޓު ވެރިފަރާތުގެ ބާރުގެ ދަށަށް ގެނެވިފައިވެއެވެ. މި މައްސަލައިގައި ތިން މީހެއްގެ އަތުން އޮޅުވާލައިގެން 10،100 ރުފިޔާ ހޯދައި، އީމެއިލް އަދި ބޭންކު އެކައުންޓު ކޮމްޕްރޮމައިޒްވެފައިވާ އެކައުންޓަކަށް ޖަމާކޮށްފައިވާ ކަމަށާއި، އޭގެ ތެރެއިން 5،600 ރުފިޔާ ފައިސާ ދައުރުވި އެކައުންޓުތަކުގެ ތެރެއިން އެކައުންޓެއްގައި ހޯލްޑް ކުރެވިފައިވާ ކަމަށް ފުލުހުން ހާމަކުރިއެވެ.
ފުލުހުން އިތުރަށް ބަޔާންކުރި ގޮތުގައި މި މައްސަލައިގެ ތަހުގީގުގައި މިހާތަނަށް ފުލުހެއްގެ އެއްވެސް ބައިވެރިވުމެއް ފާހަގަކުރެވިފައި ނުވެއެވެ. ނަމަވެސް މި މައްސަލައިގައި އޮޅުވާލައިގެން ހޯދި ފައިސާ ދައުރުކުރުމަށް ބޭނުންކުރި އެއް ބޭންކު އެކައުންޓަކީ ފުލުހެއްގެ އަނބިމީހާގެ އެކައުންޓެއް ކަމަށާއި، އެ އެކައުންޓަކީވެސް އީމެއިލް އަދި ބޭންކު އެކައުންޓު ކޮމްޕްރޮމައިޒްކޮށްގެން އެހެން ބައެއްގެ ބާރުގެ ދަށަށް ގެންގޮސްފައިވާ އެކައުންޓެއްކަން ފާހަގަކުރެވިފައިވާ ކަމަށް ފުލުހުން ބުނެއެވެ.
ތަހުގީގުގެ އެއްވެސް ހިސާބެއްގައި ފުލުހެއްގެ ބައިވެރިވުން ފާހަގަކުރެވިއްޖެނަމަ އެ ފުލުހެއްގެ މައްސަލަ ބަލާނެ ކަމަށާއި، މަކަރާއި ހީލަތުން ހޯދާފައިވާ ފައިސާގެ ތެރެއިން ރިކަވާ ނުކުރެވި ހުރި ފައިސާ ރިކަވާ ކުރުމުގެ މަސައްކަތް ތަހުގީގުގެ ތެރެއިން ކުރިއަށް ގެންދާނެ ކަމަށް ފުލުހުން ބުނެފައިވެއެވެ.
