ގާނޫނުއަސާސީގެ ދިފާއުގައި މާލޭގައި ބޮޑު ޖަލްސާއެއް ބޭއްވުމަށް އިދިކޮޅު އެމްޑީޕީން ނިންމައިފައެވެ. "ގާނޫނުއަސާސީގެ ދިފާއުގައި ރައްޔިތުންގެ" މި ނަމުގައި ބާއްވާ ޖަލްސާ އޮންނާނީ އަންނަ މަހުގެ 10 ވަނަ ދުވަހު ކާނިވާ ސަރަހައްދުގައެވެ.
އެމްޑީޕީން ބުނާ ގޮތުގައި މި ޖަލްސާ ބާއްވަނީ ގިނަ ބައެއްގެ ބުރަ މަސައްކަތުން ވުޖޫދުވި ގާނޫނުއަސާސީއަށް ރައްޔިތުންގެ ލަފައެއް ނުހޯދައި ބަދަލުތައް ގެންނަމުންދާތީއާއި، ސަރުކާރުން ފަރުދީ އަދި އަސާސީ މިނިވަންކަން ނިގުޅައިގަންނަމުންދާތީ އެކަމާ ދެކޮޅަށް އަޑުއުފުލުމަށެވެ. މި ޖަލްސާގައި ބައިވެރިވުމަށް ރާއްޖޭގެ ހުރިހާ ރައްޔިތުންނަށް އެމްޑީޕީން ވަނީ ދަޢުވަތު ދީފައެވެ.
މި ޖަލްސާ ބޭއްވުމަށް ނިންމީ ސަރުކާރުން މިދިޔަ ހަފްތާ ތެރޭގައި ގާނޫނުއަސާސީއަށް ގެނައި ކުއްލި އަވަސް އިސްލާހުތަކާ ގުޅިގެން ގިނަ ބައެއްގެ ކަންބޮޑުވުން ފާޅުކުރަމުން އަންނަ ދަނޑިވަޅެއްގައެވެ.
