ރާއްޖެއަށް މި އަހަރު ދެ މިލިއަން ފަތުރުވެރިން ގެނައުމުގެ ސަރުކާރުގެ އަމާޒު ޑިސެމްބަރު 25 ގެ ކުރިން ހާސިލުކުރެވޭނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
މި މަޢުލޫމާތު މިނިސްޓަރު ހިއްސާކުރެއްވީ ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިން ޑެސްޓިނޭޝަން އެވޯޑް" ރާއްޖެއިން ވިދިވިދިގެން ފަސްވަނަ ފަހަރަށް ހޯދުމުގެ މުނާސަބަތުގައި ބޭއްވުނު ހާއްސަ ހަފްލާގައެވެ.
ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މިހާތަނަށް މިއަހަރު ރާއްޖެއަށް 1.8 މިލިއަން ފަތުރުވެރިން ޒިޔާރަތްކޮށްފައިވެއެވެ. މިއީ ވޭތުވެދިޔަ 2023 ވަނަ އަހަރު ޑިސެމްބަރު 20 ވަނަ ދުވަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދާ އެއްވަރެވެ.
މިހާރު ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށް ބަލާއިރު، މި މަހު އެވްރެޖްކޮށް ދުވާލަކު 5,799 ފަތުރުވެރިން ރާއްޖެއަށް ޒިޔާރަތްކުރަމުންދެއެވެ. މި ރޭޓުގައި ފަތުރުވެރިން އައުން ދެމެހެއްޓިއްޖެނަމަ، ސަރުކާރުން އަމާޒުކުރާ ދެ މިލިއަން ފަތުރުވެރިންގެ އަދަދު ޑިސެމްބަރު 25 ގެ ކުރިން ހާސިލުކުރެވޭނެ ކަމަށް މިނިސްޓަރު ފައިސަލް ޔަޤީންކަން ފާޅުކުރައްވައިފައިވެއެވެ.
