ކުޑަކުއްޖެއްގެ ބަރަހަނާ މަންޒަރުތައް ހިމެނޭ ފޮޓޯއާއި ވީޑިއޯ ނަގައިގެން ގެންގުޅުނު ކަމަށް ތުހުމަތުކުރެވުނު މީހެއްގެ މައްޗަށް ދަށު ކޯޓުން އިއްވާފައިވާ 20 އަހަރުގެ ޖަލު ހުކުމް އިއްޔެ ހައި ކޯޓުން ބާތިލްކޮށްފިއެވެ. މައްސަލަ ބެއްލެވި ފަނޑިޔާރުންގެ އިއްތިފާގުން ހުކުމްކުރެއްވީ އެ ކުށް އެ މީހާގެ މައްޗަށް ސާބިތުނުވާ ކަމަށެވެ.
ހައި ކޯޓުގެ ހުކުމުގައިވާ ގޮތުގައި، ކުޑަކުދިންނަށް ޖިންސީ ގޯނާ ކުރާ މީހުންނާ މެދު ހާއްސަ އުސޫލުތަކަށް އަމަލުކުރުމުގެ ގާނޫނުގެ ދަށުން އުފުލާފައިވާ ދައުވާ ސާބިތު ކުރުމަށް، އެ އޮރިޔާންކާޑަކީ ކުޑަކުއްޖެއްގެ އޮރިޔާންކަން ސާބިތުކޮށްދޭން ޖެހޭނެއެވެ. ނަމަވެސް އެކަން ސާބިތުކުރެވޭނެ އެއްވެސް ހެއްކެއް ދައުލަތަށް ހުށަހެޅިފައި ނުވެއެވެ.
ދައުލަތުން އެ މީހާގެ މައްޗަށް އުފުލާފައިވަނީ ދެ ދައުވާއެކެވެ. އެއީ ހާއްސަ ގާނޫނުގެ ދަށުން ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަ ގޮތަށް އޮރިޔާން ކާޑު ހެދުމުގެ ދައުވާއާއި، ގާނޫނުއްއުގޫބާތުގެ ދަށުން އޮރިޔާން ކާޑު އުފެއްދުމުގެ ދައުވާއެވެ.
އޮރިޔާންކާޑު ގެންގުޅުމުގެ ކުށުގެ ދައުވާގެ އަދަބަކީ ތިން މަސް ދުވަހުގެ ޖަލު ހުކުމެކެވެ. ކުށުގެ ތުހުމަތުގައި އޭނާ ޖަލުގައި ހުންނަތާ މިހާރު ވަނީ އަހަރަކަށް ވުރެ ގިނަ ދުވަސްވެފައެވެ. އެހެންކަމުން، 20 އަހަރުގެ ހުކުމް ބާތިލްކުރުމާ ގުޅިގެން އޭނާ ޖަލުން ސަލާމަތްވާނެއެވެ.
