އެމްއެންޔޫގެ މެޑިކަލް ސްކޫލުން ކިޔެވުމަށް ބޭރު ޤައުމުތަކުގެ ޝައުޤުވެރިކަން އިތުރުވަމުންދާ ކަމަށް ހަޔަރ އެޑިޔުކޭޝަން މިނިސްޓްރީން ހާމަކޮށްފިއެވެ. ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުން، ހަޔަރ އެޑިޔުކޭޝަން މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަޒީރު ވިދާޅުވެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުގެ ފުރަތަމަ އަހަރުގެ ތެރޭގައި މީހުން ބިނާކުރުމަށް ގިނަގުނަ މަސައްކަތްތަކެއް ކުރެވިފައިވާ ކަމަށެވެ.
ރާއްޖެއިން ބޭރުގެ ދަރިވަރުންގެ ފަރާތުން ރާއްޖޭގައި ކިޔެވުމުގެ ޝައުޤުވެރިކަން އިތުރުވަމުންދާކަން ފާހަގަކުރައްވަމުން، މި އަހަރުގެ ޖަނަވަރީ މަހު އެމްއެންޔޫގެ މެޑިކަލް ސްކޫލުގައި ކިޔެވުމަށް އެއް ޤައުމަކުން އެކަނި 500 އެޕްލިކޭޝަން ލިބިފައިވާ ކަމަށް ވިދާޅުވިއެވެ. ނަމަވެސް، މިހާރު ހުރި މެޑިކަލް ސްކޫލުގެ ޖާގައިގެ ދަތިކަމާއި، ރާއްޖޭގެ ދަރިވަރުންގެ ޑިމާންޑް ބޮޑުކަމުން، އެ ފުރުސަތު ބޭރުގެ ދަރިވަރުންނަށް ދެވިފައިނުވާ ކަމަށް ޑރ. ނަޒީރު ހާމަކުރެއްވިއެވެ.
ސަރުކާރުގެ އަމާޒަކީ ހުޅުމާލޭގައި ޖާގަ ތަނަވަސް މެޑިކަލް ސްކޫލެއް ޤާއިމުކޮށް، ވީހާވެސް ގިނަ ދަރިވަރުންނަށް ފުރުސަތު ފަހިކޮށްދިނުން ކަމަށް ވިދާޅުވިއެވެ. މީގެ އިތުރުން، ބޭރުގެ ދަރިވަރުންނަށް ރާއްޖޭގައި ކިޔެވުމުގެ ފުރުސަތު ތަނަވަސްކުރުމަށްޓަކައި، އިންޓަނޭޝަނަލް ސްޓޫޑެންޓް ވިސާ ފަސޭހަކަމާއެކު ލިބޭނެ އިންތިޒާމް ހަމަޖެއްސުމާއި، އެކަމަށް ޚާއްޞަ ޤާނޫނެއް އެކުލަވާލުމުގެ މަސައްކަތް ކުރިއަށްދާ ކަމަށް ވިދާޅުވިއެވެ. އަދި ހުޅުމާލޭގައި ބޭރުގެ ދަރިވަރުންނަށް ޚާއްޞަ ދަނާލެއް އެޅުމުގެ މަސައްކަތްވެސް ކުރިއަށްދާ ކަމަށް ޑރ. ނަޒީރު ހާމަކުރެއްވިއެވެ.
