އިންޑިއާ އިން ރާއްޖެއަަށް ފޮނުވި 70 ޓަނުގެ ހަކުރު، ރާއްޖެ ނުގެނެސް، އެ ތަކެއްޗާ ހަވާލުވެ ތިބި ބައެއް ފަރާތްތަކުން ގަވާއިދާ ހިލާފަށް ސްރީ ލަންކާއަށް ގެންދިޔަ ކަމަށް ބުނާ މައްސަލައެއް އިންޑިއާގެ ސަރުކާރުން ތަހުގީގު ކުރަން ފަށައިފިއެވެ.
އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި ހާއްސަ އެއްބަސްވުމެއްގެ ދަށުން އިންޑިއާ އިން ރާއްޖެއަށް ފޮނުވަން ނިންމީ ޖުމްލަ 64،494.33 ޓަނުގެ ހަކުރެވެ.
އިންޑިއާގެ އިކޮނޮމިކް މިނިސްޓްރީގެ ދަށުން ހިންގާ ދި ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ)އާ ހަވާލާދީ އިންޑިއާ ޝިޕިން ނިއުސްގައި ބުނެފައިވަނީ މިދިޔަ 25 އޮކްޓޫބަރުގައި އެ މައްސަލަ ރިޕޯޓުކޮށްފައިވާތީ އެކަން ބަލަމުން އަންނަ ކަމަށެވެ.
އެ މައްސަލަ ފެންމަތިވުމާ އެކު، އިންޑިއާ އިން ފޮނުވި ހަކުރު ލަންކާގެ ކަސްޓަމްސް އިން ވަނީ ހިފަހައްޓައިފައެވެ. އެއީ 70 ކޮންޓެއިނަރެވެ.
މިދިޔަ އަހަރުގެ ސެޕްޓެމްބަރު މަހުން ފެށިގެން މިދިޔަ އޮކްޓޫބަރުގެ ނިޔަލަށް އިންޑިއާ އިން އާންމު ގޮތެއްގައި ހަކުރު އެކްސްޕޯޓް ނުކުރަން ނިންމާފައިވީ ނަމަވެސް، ރާއްޖެއަށް އެ ތަކެތި ގެނައީ ދެ ގައުމުގެ ދެމެދު ހެދި ހާއްސަ އެއްބަސްވުމުގެ ދަށުންނެވެ. އެ އެއްބަސްވުމުގެ ދަށުން، ހަކުރުގެ އިތުރުން ހަނޑޫ، ފުށް، މުގު، ބިސް، ފިޔާ އަދި އަލުވި އިންޑިއާ އިން ރާއްޖެއަށް އިމްޕޯޓްކުރަން ނިންމިއިރު، މީގެކުރިން ފޯރުނުކޮށްދޭ މިންވަރަށް ރާއްޖެއަށް ކާޑުގެ ބާވަތްތައް ފޯރުކޮށްދިނުމަށް ނިންމާފައިވެއެވެ.
މިކަމުން ވެސް ރާއްޖެ އާއި އިންޑިއާއާ ދެމެދު އޮތް ވަރުގަދަ އަދި ބަދަހި ގުޅުން ފާހަގަކޮށްލެވެއެވެ.
