އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަދި ކުރީގެ ދިފާއީ ވަޒީރު ޔޯވް ގަލަންޓް ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓުން (އައިސީސީ) އަމުރެއް ނެރެފިއެވެ. މި އަމުރު ނެރެފައިވަނީ އޮކްޓޯބަރު 7 ގެ ހަމާސްގެ ހަމަލާއަށްފަހު ޣައްޒާގައި ހިންގި ހަނގުރާމައިގެ ޖަރީމާތަކުގެ ތުހުމަތުގައެވެ.
މީގެ އިތުރުން، ހަމާސްގެ ލީޑަރ މުހައްމަދު ދިއާބް އިބްރާހީމް އަލް-މަސްރީ (މުހައްމަދު ދީފް)އަށްވެސް ހައްޔަރު އަމުރެއް ނެރުނެވެ. އޭނާއަކީ އޮކްޓޯބަރު 7 ގެ ހަމަލާތައް ރާވާ ހިންގި މީހުންގެ ތެރެއިން މީހެއްކަމަށް އިޒްރޭލުން ބުނެއެވެ. މިއަހަރުގެ ކުރީކޮޅު އެއަރ ސްޓްރައިކެއްގައި ދީފް މަރުވެފައިވާކަމަށް އިޒްރޭލުން ބުނެއެވެ.
ހިނގައިދިޔަ ކަންތައްތަކުގެ ތަރުތީބު:
• އައިސީސީ ޕްރޮސެކިއުޓަރ ހައްޔަރު އަމުރަށް އެދުން: މެއި މަހު، އައިސީސީ ޕްރޮސެކިއުޓަރ ކަރީމް ޚާން ސީއެންއެންއަށް ބުނެފައިވަނީ ނަތަންޔާހޫ، ގަލަންޓް، އަދި ނިޔާވި ހަމާސްގެ ލީޑަރު ޔަހްޔާ ސިންވާރާއި އިތުރު ދެ ހަމާސް އޮފިޝަލަކު ހައްޔަރުކުރުމަށް އަމުރު ނެރޭ ކަމަށެވެ. މިއީ ހަނގުރާމައިގެ ޖަރީމާތަކާއި އިންސާނިއްޔަތާ ދެކޮޅު ޖަރީމާތަކުގެ ދައުވާތަކެކެވެ.
• އިޒްރޭލުން ބުނީ ކީކޭ؟ އިޒްރޭލުގެ އޮފިޝަލުން މި ނިންމުން ކުށްވެރިކުރިއެވެ. އިޒްރޭލުގެ ބޮޑުވަޒީރު ބުނެފައިވަނީ މި ނިންމުމުން ޣައްޒާގައި ކުރިއަށްގެންދާ ހަނގުރާމަ ހުއްޓުވޭނެ ކަމަކަށް ނުބެލޭ ކަމަށެވެ.
• ހަމާސްއިން ބުނީ ކީކޭ؟ ހަމާސްއިން ބުނެފައިވަނީ، އެއްވެސް ގާނޫނީ އަސާސެއް ނެތި ފަލަސްތީނުގެ މުޖާހިދުންގެ ލީޑަރުން ހައްޔަރު އަމުރު ނެރެ، އަނިޔާ ލިބޭ ފަރާތްތަކާއި އަނިޔާވެރިން އެއްހަމައަކަށް ގެނައުމަށް އައިސީސީ ޕްރޮސެކިއުޓަރ ކުރާ މަސައްކަތް ހަރުކަށި އިބާރާތުން ކުށްވެރިކުރާ ކަމަށެވެ.
• "އެކަކުވެސް ގާނޫނަށްވުރެ މަތިވެރިއެއް ނޫން": ޚާންގެ އިއުލާނަށްފަހު މަސްތަކެއް ވަންދެން، އައިސީސީގެ ފަނޑިޔާރުންގެ ޕެނަލަކުން ޚާންގެ ހުށަހެޅުން ދިރާސާކުރުމަށްފަހު ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ "ހައްޔަރު އަމުރު ނެރުމަށް ހުރަސްއަޅާނެ އެއްވެސް ސަބަބެއް ނެތް" ކަމަށެވެ.
