މޫސުމާ ބެހޭ ގައުމީ އިދާރާ (މެޓު އޮފީސް) އިން މިއަދު ހާމަކުރި ގޮތުގައި ފާއިތުވި 24 ގަޑިއިރުގެ ތެރޭގައި އައްޑޫ ސިޓީ ހިތަދޫއަށް 110 މިލިމީޓަރުގެ ވާރޭ ވެހި، މިއީ އެންމެ ގިނައިން ވާރޭވެހުނު ރަށްކަން ހާމަ ކޮށްފިއެވެ.
މެޓު އޮފީހުން އިތުރަށް ހާމަކުރި ގޮތުގައި، މި ވިއްސާރަ ކުރަމުންދަނީ ރާއްޖޭގެ ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރާ ދިމާކޮށް މި ސަރަހައްދުގައި އުފެދިފައިވާ ލޯ ލެވެލް ސާކިއުލޭޝަންއަކާ ގުޅިގެންނެވެ. މީގެ ސަބަބުން ރާއްޖޭގެ ބޮޑު ބަޔަކަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭ ވެހިފައިވެއެވެ.
މިގޮތުން އައްޑޫ އަތޮޅު ގަމަށް 106 މިލިމީޓަރުގެ ވާރޭ ވެހުނު އިރު، އއ. ތޮއްޑޫގައި 103 މިލިމީޓަރު އަދި އދ. މާމިގިލީގައި 95 މިލިމީޓަރުގެ ވާރޭ ވެހިފައިވެއެވެ. މި ބޯ ވިއްސާރައިގެ ސަބަބުން އައްޑޫގެ ބައެއް ރަށްތަކުގައި ފެން ބޮޑުވެ، އެމްއެންޑީއެފުން ވަނީ ޕަންޕު ޖަހައިގެން ފެން ހިންދުމުގެ މަސައްކަތުގައި ބައިވެރިވެފައެވެ.
ކުރިއަށް އޮތް ތިން ދުވަހު ވެސް ރާއްޖޭގެ އެކި ސަރަހައްދުތަކަށް ވިއްސާރަ ކުރާނެ ކަމަށް މެޓު އޮފީހުން ލަފާކޮށް، މޫސުމަށް ސަމާލުވުމަށް އިލްތިމާސްކޮށްފައިވެއެވެ. އަދި ބޯކޮށް ވާރޭވެހި، ގުގުރާނެ ކަމަށް ލަފާކޮށް، ހެނދުނު 8:50 އިން މެންދުރު 13:00 އަށް ބ އަތޮޅުން ފެށިގެން ވ އަތޮޅަށް ރީނދޫ ސަމާލު ނެރުނު އިރު، ހެނދުނު 10:00 އިން 13:30 އަށް ވ އަތޮޅުން ފެށިގެން އައްޑޫ ސިޓީއާ ހަމައަށް ހުދު ސަމާލު ނެރެފައިވެއެވެ.
