މާލޭގައި ކޭބަލް ނަރުތަކެއް ވަގަށް ނެގި މައްސަލައެއްގައި ހައްޔަރު ކޮށްފައިވާ ގދ. އަތޮޅަށް ނިސްބަތްވާ 36 އަހަރުގެ ފިރިހެން މީހާ، އިއްޔެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ މީހާ 15 ދުވަހުގެ މުއްދަތަށް ބަންދުކުރުމަށް ކޯޓުން އަމުރު ކޮށްފިއެވެ.
ކޯޓު އަމުރުގައި ފާހަގަކޮށްފައިވާ ގޮތުގައި، މި ކުށް އެ މީހާ ކުރިކަމަށް ތުހުމަތުކުރެވޭ މިންވަރެއްގެ ހެކި ގަރީނާ ހުށަހަޅާފައިވެއެވެ. ހާދިސާ ހިނގި ސަރަހައްދަށް ދިޔަ ފުލުހުންގެ ރިޕޯޓަށް ބިނާކޮށް، އެ މީހާ އެ ކުށް ކޮށްފައިވާ ކަމަށް ބެލެވޭކަމަށް އަމުރުގައި ބަޔާންކޮށްފައިވެއެވެ.
އަދި މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީ، އޭނާ ބަންދުގައި ބަހައްޓަން ޖެހޭކަމަށްވެސް ކަނޑައަޅާފައިވެއެވެ.
މައްސަލައިގެ ތަހުގީގަށް ބަޔާންދިން ފަރާތަކާ ހަވާލާދީ، އައިއޯ ބުނެފައިވާ ގޮތުގައި، އެ މީހާ ކޭބަލް ނަރުތައް ނަގާފައިވަނީ ތާޖުއްދީން ސްކޫލް ކައިރިންނެވެ. ނަމަވެސް ހައްޔަރުކުރެވުނު މީހާ ބުނެފައިވަނީ އެއީ ވަގަށް ނަގާފައިވާ އެއްޗެއް ނޫން ކަމަށާއި، ގޮނޑުދޮށުން ހޮވައިގެން ގެންގުޅޭ އެއްޗެއް ކަމަށެވެ.
ކޭބަލް ނަރު ވަގަށް ނެގުމުގެ މައްސަލަތައް މިފަހަކަށް އައިސް ވަނީ އިތުރުވެފައެވެ. ޓްރާންސްފޯމަރުތަކަށް ވަދެ ވައްކަންކުރުމުގެ މައްސަލަތައް ގިނަވެ، ގިނަ ސަރަހައްދުތަކުން ކަރަންޓު ކެނޑިފައިވާއިރު، މިދިޔަ މާޗް މަހު ޓްރާންސްފޯމަރަކުން ވައްކަންކުރަން އުޅުނު މީހަކު މަރުވެފައިވެއެވެ. އަދި މިފަދަ މައްސަލައެއްގައި މިދިޔަ މަހު ހައްޔަރުކުރެވުނު މީހަކު މިހާރުވެސް ހުރީ ބަންދުގައެވެ.
