ހުކުރު ދުވަހު އިއުލާން ކުރެވުނު ރަސްމީ އިންތިޚާބުގެ ނަތީޖާތަކުން ދައްކާގޮތުގައި، ސްރީލަންކާގެ އައު މާކްސިސްޓް-ވިސްނުން ގެންގުޅޭ ރައީސް އަނުރާ ކުމާރާ ދިސަނާޔަކެގެ ޕާޓީއަށް ވަނީ ޕާލިމަންޓުގެ ތިންބައިކުޅަ ދެބައިގެ މެޖޯރިޓީ ލިބިފައެވެ.
މިއީ އޭނާގެ އިގްތިސާދީ އާރާސްތުކުރުމުގެ ޕްރޮގްރާމަށް ލިބުނު ވަރުގަދަ މެންޑޭޓެކެވެ.
އިންތިޚާބާ ބެހޭ ކޮމިޝަނުން ބުނާގޮތުގައި، ދިސަނާޔަކެގެ ނެޝަނަލް ޕީޕަލްސް ޕަވަރ ޕާޓީއަށް 225 ގޮނޑިން 159 ގޮނޑި ލިބިފައިވެއެވެ. އިދިކޮޅު ލީޑަރު ސަޖިތް ޕްރެމަދާސާގެ ސަމަގި ޖަނަ ބަލަވެގަޔާ ނުވަތަ ޔުނައިޓެޑް ޕީޕަލްސް ޕަވަރ ޕާޓީއަށް ލިބިފައިވަނީ 40 ގޮނޑިއެވެ.
1948 ގައި އިނގިރޭސި ވެރިކަމުން މިނިވަންވީ ފަހުން އެ ޤައުމު ވެރިކަން ކޮށްފައިވާ ސިޔާސީ ޕާޓީތައް ދޫކޮށް ސްރީލަންކާ ރައްޔިތުން ދިސަނާޔަކެ އިންތިޚާބު ކޮށްފައިވަނީ ސެޕްޓެމްބަރ 21 ގައެވެ.
ނަމަވެސް އޭނާއަށް ލިބުނީ އެންމެ 42 އިންސައްތަ ވޯޓެވެ. މިކަމުގެ ސަބަބުން ބުރާސްފަތި ދުވަހުގެ ޕާލިމަންޓް އިންތިޚާބުގައި އޭނާގެ ޕާޓީގެ ނަތީޖާއާ މެދު ސުވާލު އުފެދުނެވެ. އެހެން ނަމަވެސް އޭނާގެ ރިޔާސަތުގެ ދެ މަސް ނުވަނީސް ޕާޓީއަށް ވަނީ ތާއީދު ބޮޑުތަން އިތުރުވެފައެވެ.
މި އިންތިޚާބު އައީ ސްރީލަންކާގެ ރައްޔިތުންނަށް މުހިންމު ދަނޑިވަޅެއްގައެވެ. އެއީ، 2022 ގައި ބޭރުގެ ދަރަނި ދެއްކުން ހުއްޓާލުމަށްފަހު ބަނގުރޫޓުވިކަން އިއުލާންކުރި އެ ޤައުމު މިހާރު އެންމެ ނުރައްކާތެރި އިގްތިސާދީ ހީނަރުކަމުން އަރައިގަތުމަށް މަސައްކަތްކުރަމުންދާތީއެވެ.
އައި.އެމް.އެފްގެ ބެއިލްއައުޓް ޕްރޮގްރާމެއްގައި މިހާރު އެ ޤައުމު އޮތްއިރު، ބައިނަލްއަގުވާމީ ދަރަނިވެރިންނާއެކު ދަރަނި އަލުން ރޭވުމުގެ މަސައްކަތް ވެސް ވަނީ ގާތްގަނޑަކަށް ނިމިފައެވެ.
އޭނާގެ ކުރީގެ ރައީސް ރަނިލް ވިކްރަމަސިންހެ ސޮއިކުރި އައި.އެމް.އެފް އެއްބަސްވުމުގައިވާ ޓާގެޓްތަކަށް މުހިންމު ބަދަލުތަކެއް ހުށަހަޅާނެކަމަށް ރިޔާސީ ކެމްޕޭނުގައި ދިސަނާޔަކެ ބުނެފައިވެއެވެ. އެއީ އެ އެއްބަސްވުމުގައި ރައްޔިތުންނަށް މާ ބޮޑު ބުރަ އުފުލަން ޖެހޭތީއެވެ. އެހެން ނަމަވެސް، އޭގެ ފަހުން އޭނާގެ ވިސްނުން ބަދަލުވެ، އެ އެއްބަސްވުމާ އެއްގޮތަށް ސްރީލަންކާއިން ދާނެކަމަށް ބުނެފައިވެއެވެ.
