އެމްޓީޑީސީގެ މިއަހަރުގެ ތިންވަނަ ކުއާޓަރުގެ މާލީ ހިސާބުތަކަށް ބަލާއިރު، މި މުއްދަތުގައި ކުންފުންޏަށް 3.5 މިލިއަން ރުފިޔާގެ ސާފު ފައިދާ ލިބިއްޖެއެވެ. ސަރުކާރާއި ރައްޔިތުން ހިއްސާވާ މި ކުންފުނިން ނެރެފައިވާ މާލީ ބަޔާނުގައިވާ ގޮތުން، މި ކުއާޓަރުގައި 20.3 މިލިއަން ރުފިޔާ (1.3 މިލިއަން ޑޮލަރު) އާމްދަނީގެ ގޮތުގައި ލިބިފައިވެއެވެ.
ޚަރަދުތައް އުނިކުރުމަށްފަހު، ވިޔަފާރިން 5.6 މިލިއަން ރުފިޔާ (364،574 ޑޮލަރު) ލިބުނު އިރު، ޓެކްސް ކެނޑުމުގެ ކުރިން ކުންފުންޏަށް 6.2 މިލިއަން ރުފިޔާގެ (402،689 ޑޮލަރު) ފައިދާ ލިބިފައިވެއެވެ. މީގެތެރެއިން ޓެކްސްގެ ގޮތުގައި 60،403 ޑޮލަރު ކެނޑުމަށްފަހު، ސާފު ފައިދާގެ ގޮތުގައި 5.3 މިލިއަން ރުފިޔާ (342،286 ޑޮލަރު) ވަނީ ލިބިފައެވެ.
ކުންފުނީގެ ބެލެންސް ޝީޓަށް ބަލާއިރު، އެހެން ފަރާތްތަކަށް ދައްކަންޖެހޭ ފައިސާގެ އަދަދު ކުޑަވެފައިވީ ނަމަވެސް، އަދިވެސް ސަރުކާރަށް އެކަނި 102 މިލިއަން ރުފިޔާއަށްވުރެ ގިނަ (6.6 މިލިއަން ޑޮލަރު) ދައްކަން އެބައޮތެވެ. މީގެއިތުރުން، އެހެނިހެން ވިޔަފާރިތަކަށް 78 މިލިއަން ރުފިޔާއަށްވުރެ ގިނަ ފައިސާ ދައްކަން އޮތްއިރު، ކުންފުންޏަށް 36 މިލިއަން ރުފިޔާއަށްވުރެ ގިނަ ފައިސާ ލިބެން އެބައޮތެވެ.
2006 ވަނަ އަހަރު ރައީސް މައުމޫންގެ ވެރިކަމުގައި އުފެއްދި މި ކުންފުނީގެ މައިގަނޑު މަޤްޞަދަކީ ޓޫރިޒަމްގެ މަންފާ ދިވެހި ރައްޔިތުންނަށް ސީދާ ގޮތެއްގައި ފޯރުކޮށްދިނުމެވެ.
