ޓުއަރިޒަމް ވިޔަފާރިތަކުން ބޭރުފައިސާ ބޭންކަށް މާރުކުރަން މަޖުބޫރުކުރާ ސަރުކާރުގެ ގަވާއިދާ އިދިކޮޅު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ސަރުކާރުން އެކުލަވާލި އައު ގަވާއިދުގެ ދަށުން ރިސޯޓުތަކާއި އެހެނިހެން ފަތުރުވެރިކަމުގެ ވިޔަފާރިތަކުން ކޮންމެ ފަތުރުވެރިއެއްގެ އަތުން 500 ޑޮލަރު ބޭންކަށް މާރުކުރަންޖެހެއެވެ. އަދި 50 އެނދަށްވުރެ މަދު ގެސްޓްހައުސްތަކުން 25 ޑޮލަރު މާރުކުރަން ޖެހެއެވެ.
ރާއްޖޭގެ ރިސޯޓުތަކުގެ ވެރިން މިކަމާ އިދިކޮޅަށް ސިޓީ ފޮނުވުމާ ގުޅިގެން، ނަޝީދު ވިދާޅުވެފައިވަނީ ޓެކްސް ފިޔަވައި އިތުރު ކަންކަމަށް ސަރުކާރުން ވިޔަފާރިވެރިން މަޖުބޫރުކޮށްގެން ނުވާނެ ކަމަށެވެ. އަދި އަމިއްލަ ފައިސާއިން ކުރަންވީ ކަންކަން ސަރުކާރަށް ނުނިންމޭނެ ކަމަށެވެ.
ރިސޯޓްތަކުގެ ވެރިން ޓެކްސް ދައްކާ. ބާކީ އެއީ އެމީހުންގެ އަމިއްލަ ފައިސާ. ބަހައްޓަން ބޭނުންވާ ތަނެއްގައި ބެހެއްޓެން ވާނެ. ހަރަދުކުރަންވީ ގޮތެއް ވެސް އެ މީހުންނަށް ނިންމެން ވާނެ.
ވިޔަފާރިވެރިން ތިބޭ ވަޓްސް އެޕް ގްރޫޕަކަށް ކުރީގެ ރައީސް މުޙައްމަދު ނަޝީދު ފޮނުއްވި މެސެޖެއްގައި ވިދާޅުވެފައި ވެއެވެ.
މީގެ އިތުރުން، ފޮރިން ރިޒާވު އިތުރު ނުކުރެވޭ ކަން ސަރުކާރުން ގަބޫލުކުރަންޖެހޭ ކަމަށާއި، ސަރުކާރުގެ ދަރަނި ދެއްކުމަށް ޓެކްސް ބޮޑުކުރިޔަސް އެކަށީގެންވާ އާމްދަނީއެއް ނުލިބޭނެ ކަމަށް ނަޝީދު ފާހަގަކުރައްވައެވެ. ނަޝީދު ހުށަހަޅުއްވާ ހައްލަކީ ދަރަނި ދެއްކުން ފަސްކޮށް މުރާޖާކުރުމެވެ.
