ރައްޔިތުންގެ މަޖިލީހުގައި މިއަދު ބޭއްވުނު ޖަލްސާގައި ނުހައްގު މުއްސަދިކަން ހޯދުމުގެ މައްސަލަތަކުގައި ދަޢުވާކުރުމަށް ހުރި ގޮންޖެހުންތައް ނައްތާލުމަށް ސަރުކާރުން ހުށަހެޅި ގާނޫނުލްއުގޫބާތުގެ އިސްލާހު ބިލު މަޖިލީހުން ބަލައިގެންފިއެވެ.
މާފުށި ދާއިރާގެ މެންބަރު ހުސައިން ރިޒާ އާދަމް ހުށަހެޅުއްވި މި ބިލު ވަނީ ވޯޓުގައި ބައިވެރިވި 70 މެންބަރުންގެ އިއްތިފާގުން ފާސްކޮށް، ދިރާސާކުރުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވާފައެވެ.
މި އިސްލާހުގެ ދަށުން ރައީސުން، ވަޒީރުން، މަޖިލިސް މެންބަރުން އަދި ފަނޑިޔާރުންގެ މަގާމުގައި ތިބޭ ފަރާތްތަކުން ނުހައްގު މުއްސަނދިކަން ހޯދުމަކީ ޖިނާޔަތުގެ ދެވަނަ ދަރަޖައިގެ ކުށެއްގެ ގޮތުގައި ކަނޑައަޅައި، އެފަދަ ކުށްތަކަށް 15 އަހަރާ ހަމައަށް ޖަލު ހުކުމެއް ކަނޑައެޅިދާނެއެވެ. އަދި ލިބުނު ފައިދާގެ ދެގުނަ ނުވަތަ އެއް މިލިއަން ރުފިޔާއިން ޖޫރިމަނާ ކުރެވޭނެއެވެ. އެހެން ފަރާތްތަކުން މިފަދަ ކުށެއް ކޮށްފިނަމަ، އެއީ ތިންވަނަ ދަރަޖައިގެ ކުށެއްގެ ގޮތުގައި ބަލައި، އަށް އަހަރާ ހަމައަށް ޖަލު ހުކުމަކާއި، ލިބުނު ފައިދާގެ ދެގުނަ ނުވަތަ ހަތަރުލައްކަ ރުފިޔާއިން ޖޫރިމަނާ ކުރެވޭނެއެވެ.
ދައުލަތުގެ މުވައްޒަފެއްގެ އާމްދަނީއާ ނުބައްދަލު ދިރިއުޅުމުގެ ފެންވަރެއް ދެމެހެއްޓުމަކީ ނުވަތަ މުދަލާއި ފައިސާ ހޯދުމަކީ ކުށެއްގެ ގޮތުގައި މި އިސްލާހުގައި ކަނޑައަޅާފައިވެއެވެ. އަދި އެފަދަ މުދަލާއި ފައިސާ އާއިލީ ނުވަތަ ވިޔަފާރީގެ ގުޅުން އޮންނަ ފަރާތެއްގެ ނަމުގައި ބެހެއްޓިކަމުގައިވިޔަސް، އެއީ އެ މުވައްޒަފެއްގެ ނަމުގައި ހުރި މުދަލެކޭ އެއްފަދައިން ބެލެވޭނެއެވެ.
ރައީސް ޑރ. މުހައްމަދު މުއިއްޒު ވިދާޅުވި ގޮތުގައި މި އިސްލާހު ގެނައުމުގެ މަގްސަދަކީ ދައުލަތުގެ އިދާރާތަކުގައި އަށަގެންފައިވާ ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދަޢުވާކުރުމަށް ހުރި ގޮންޖެހުންތައް ނައްތާލުމެވެ.
