އިމިގްރޭޝަނުން ހިންގަމުންދާ އޮޕަރޭޝަނެއްގެ ދަށުން ހުޅުމާލޭގައި ހުރި ސެލޫން ހިންގަމުންދިޔަ ތަންތަން ބަލައި ފާސްކުރުމަށްފަހު، ސައްހަ ވިސާއެއް ނެތި އުޅެމުންދިޔަ ފަސް ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މި އޮޕަރޭޝަން ހިންގީ މިދިޔަ ހޮނިހިރު ދުވަހު ކަމަށް އިމިގްރޭޝަނުން "އެކްސް" ގައި ކުރި ޕޯސްޓެއްގައި ބުނެފައިވެއެވެ.
މި ސަރުކާރުން ވެރިކަމާ ހަވާލުވުމަށްފަހު، ގަވާއިދާ ޚިލާފަށް އުޅެމުންދާ ބިދޭސީން ހޯދައި ފިޔަވަޅު އެޅުމުގެ މަސައްކަތް ވަނީ އިތުރަށް ހަރުދަނާކޮށްފައެވެ.
އިމިގްރޭޝަންގެ ތަފާސްހިސާބުތަކުން ދައްކާގޮތުގައި މިދިޔަ އަހަރުގެ ނޮވެމްބަރު 17 އިން ފެށިގެން މިދިޔަ މަހުގެ 17 އާ ހަމައަށް، 4،054 ބިދޭސީން ވަނީ އެމީހުންގެ ގައުމުތަކަށް އަނބުރާ ފޮނުވާލާފައެވެ. މި މަސައްކަތުގައި އެންމެ އިސް ދައުރެއް އަދާކުރި މަހަކީ މި އަހަރުގެ ޖޫން މަސް ކަމަށް އިމިގްރޭޝަނުން ވަނީ ފާހަގަކޮށްފައެވެ.
