ސަރުކާރުގެ އުމްރާނީ ތަރައްޤީގެ ސަރަހައްދީ ތަސައްވުރުގެ ދަށުން އާބަން ސެންޓަރު ތަރައްޤީކުރުމުގައި ދެކުނުގެ އަތޮޅުތައް އެއްކިބާކޮށްފައި ނުވާނެ ކަމުގައި ހައުސިން މިނިސްޓްރީން މިރޭ ހާމަކޮށްފިއެވެ. މިއަދު ސަރުކާރުން އާބަން ސެންޓަރުތައް ތަރައްޤީކުރާނެ 7 ރަށެއް އިއުލާންކުރުމާ ގުޅިގެން، އިދިކޮޅު އެމްޑީޕީން ވަނީ ދެކުނުގެ އަތޮޅުތައް އެއްކިބާކޮށްފައިވާ ކަމަށް ފާހަގަކޮށްފައެވެ.
މިކަމާ ގުޅިގެން ހައުސިން މިނިސްޓްރީން ނެރުނު ބަޔާނުގައި ވިދާޅުވެފައިވަނީ، ރައީސުލްޖުމްހޫރިއްޔާގެ އުމްރާނީ ތަރައްޤީގެ ތަސައްވުރުގައި ރާއްޖޭގެ އުތުރާއި ދެކުނުގެ ހަތަރު އަތޮޅު ހިމެނޭ ގޮތަށް ދެ ސަރަހައްދެއް ތަރައްޤީކުރުން ހިމެނޭ ކަމަށެވެ. އެގޮތުން، އާބަން ސެންޓަރުތައް ތަރައްޤީކުރުމަށް ރާވާފައިވާ ސަރަހައްދުތަކުގެ ތެރޭގައި ހުވަދުއަތޮޅު އުތުރުބުރި، ހުވަދު އަތޮޅު ދެކުނުބުރި، ފުވައްމުލައް ސިޓީ އަދި އައްޑޫ ސިޓީ ހިމެނެއެވެ.
މިނިސްޓްރީން އިތުރަށް ހާމަކުރި ގޮތުގައި، ދެކުނުގެ އަތޮޅުތަކުގައިވެސް އެކި ރަށްރަށުގެ އާބާދީއާއި ތަރައްޤީ އެއްފަސްކުރުމުގެ ސިޔާސަތުގެ ދަށުން އާބަން ސެންޓަރުތައް ތަރައްޤީކުރެވޭނެއެވެ. އަދި މިނިސްޓްރީން ފާހަގަކުރެއްވި ގޮތުގައި މިކަމާ ގުޅޭގޮތުން ރައްޔިތުންނަށް އޮޅުންއަރާފަދަ ގޮތަކަށް ހަބަރުތައް ފަތުރަމުންދާކަން ފާހަގަކުރެވެއެވެ. ހައުސިން މިނިސްޓްރީން އަދި އިތުރަށް ހާމަކުރި ގޮތުގައި މިއަދު އިއުލާންކުރި 7 ރަށް ކަނޑައަޅާފައިވަނީ ދެކުނުގެ އަތޮޅުތައް އިސްތިސްނާ ނުވާނެ ގޮތަށެވެ.
