ދައުލަތުގެ 2025 ވަނަ އަހަރުގެ ބަޖެޓުގައި ހިމަނާފައިވާ ގޮތުން، އަންނަ އަހަރު ރާއްޖެއަށް 2.2 މިލިއަން ފަތުރުވެރިން ޒިޔާރަތްކުރާނެ ކަމަށް ސަރުކާރުން ލަފާކޮށްފިއެވެ.
މިއީ މި އަހަރުގެ އަމާޒުކަމުގައިވާ 2 މިލިއަން ފަތުރުވެރިންނާ އަޅާބަލާއިރު 2 ލައްކައިގެ އިތުރުވުމެކެވެ. އަދި ފަތުރުވެރިކަމުގެ ބެޑް ނައިޓްސް 14.2 މިލިއަނަށް އަރާނެކަމަށްވެސް ލަފާކުރެވެއެވެ.
މި އިތުރުވުން ހާސިލުކުރުމަށް މަގުފަހިވާނެ އެންމެ މުހިންމު އެއް ކަމަކީ އަންނަ އަހަރު ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވުމަށް ހަމަޖެހިފައިވުމެވެ. މިއީ އެއަރޕޯޓު ޒަމާނީ ފެންވަރަށް ތަރައްގީކުރުމުގެ ބިޔަ މަޝްރޫއުގެ އެންމެ މުހިންމު ބައެވެ. މިހާރު ބޭނުންކުރަމުންދާ އިންޓަރނޭޝަނަލް ޓަރމިނަލަކީ އަހަރަކު 1.5 މިލިއަން ފަސިންޖަރުންނަށް ޚިދުމަތްދެވޭ ވަރުގެ ތަނެއް ނަމަވެސް، 78،000 އަކަމީޓަރުގެ އައު ޓަރމިނަލުން އަހަރަކު 7 މިލިއަން ފަސިންޖަރުންނަށް ޚިދުމަތް ފޯރުކޮށްދެވޭނެއެވެ.
އައު ޓަރމިނަލްގައި އެއިރޯ ބޯޑިން ބްރިޖްތަކާއި އެންމެ ޒަމާނީ ބެގޭޖް ހޭންޑްލިން ސިސްޓަމްތައް ޤާއިމުކުރެވޭނެއެވެ. އަދި މިހާރު ދިމާވެފައިވާ ޖާގައިގެ ދަތިކަން ހައްލުވެ، އެފް އެންޑް ބީގެ ގިނަ އައުޓްލެޓްތަކާއި، ރީޓެއިލް ސްޕޭސްތަކާއި، ލައުންޖްތަކާއި އެހެނިހެން ޚިދުމަތްތައްވެސް މި ޓަރމިނަލްގައި ޤާއިމުކުރެވޭނެއެވެ.
މި ތަރައްޤީއާއެކު ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށް ފާހަގަކޮށްލެވޭ ކުރިއެރުމެއް ލިބޭނެކަމަށް ބެލެވެއެވެ.
