ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގެ ފުރަތަމަ އަހަރުގެ ތެރޭގައި ރާއްޖޭގެ މަސްވެރިކަމުގެ ސިނާއަތް ވަރުގަދަކުރުމަށް ބޭނުންވާ ބިންގާތައް އަޅައި ނިމިފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމު ވިދާޅުވެއްޖެއެވެ.
ޕަބްލިކް ސާވިސް މީޑިޔާ (ޕީއެސްއެމް)އަށް ދެއްވި ބަސްދީގަތުމެއްގައި، މަސްވެރިކަމުގެ ސިނާއަތުގެ ތަރައްގީއަށް ކުރަންހުރި މަސައްކަތްތައް ވަރަށް ގިނަކަމަށް ފާހަގަކުރެއްވިއެވެ. ޚާއްޞަކޮށް އުމްރާނީ ވަސީލަތްތައް ތަރައްގީކުރުމުގެ ދާއިރާއިން ކުރަންޖެހިފައިވާ މަސައްކަތްތައް ގިނަގުނަކަން ވަޒީރު ޝިޔާމު ފާހަގަކުރެއްވިއެވެ.
ރާއްޖޭގައި ސިނާއީ ގޮތެއްގައި މަސްވެރިކަމުގެ މަސައްކަތް ފެށުނީ ފެލިވަރުގައި މަސް ބަންދުކުރާ ކާރުޚާނާ ހުޅުވުނު ހިސާބުންނެވެ. މި ކާރުޚާނާއަށް 47 އަހަރުވެފައިވާއިރު، މިހާރުވެސް ދުވާލަކު ޕްރޮސެސްކުރެވެނީ އެންމެ 35 ޓަނު މަހެވެ. އެހެންކަމުން، ރައީސް މުއިއްޒުގެ ވެރިކަމުގެ ފުރަތަމަ އަހަރު އިސްކަންދެވުނީ މަސްވެރިކަމުގެ ސިނާއަތަށް ވަރުގަދަ ބިންގަލެއް އެޅުމަށެވެ.
މިހާރު ރާއްޖޭގައި މަސް ރައްކާކުރެވޭ ކެޕޭސިޓީ ހުރީ 8،500 ޓަނުގައެވެ. މި ގޮންޖެހުމުން އަރައިގަތުމަށް، ރާއްޖޭގެ އެކި ކަންކޮޅުތަކުގައި އިތުރު ފެސިލިޓީތައް ގާއިމުކުރުމުގެ މަސައްކަތް ފެށިފައިވެއެވެ. މި މަސައްކަތްތަކާއެކު ކޯލްޑް ސްޓޯރޭޖް ކެޕޭސިޓީ 25،000 ޓަނަށް އިތުރުކުރެވޭނެ ކަމަށް ވަޒީރު ވިދާޅުވިއެވެ.
މަސް ރައްކާކުރެވޭނެ ނިޒާމުތައް ރަނގަޅަށް ނެތުމުން، މިހާރު ޖެހެނީ ތާޒާކޮށް މަސް ބޭރުކުރަންނެވެ. މިއީ މަހުގެ އަގު ކަނޑައެޅުމުގެ ބާރު ރާއްޖެއަށް ނުލިބޭ މައިގަނޑު ސަބަބެވެ. ރައީސްގެ ވިސްނުންފުޅަކީ ދިވެހި މަސްވެރިން ބާނާ ހުރިހާ މަހެއް އަގު އިތުރުކޮށްގެން ބޭރުކުރުން ކަމަށް ވަޒީރު ފާހަގަކުރެއްވިއެވެ. މި ގޮތުން މަސްވެރިކަމަށް ކުރިމަތިވެފައިވާ އެކި މައްސަލަތަކަށް ދާއިމީ ހައްލު ހޯދުމަށް ސަރުކާރުން މަސައްކަތް ފަށާފައިވާ ކަމަށް ވަޒީރު ޝިޔާމު ވިދާޅުވެފައިވެއެވެ.
