އަންނަ އަހަރުގެ ނިޔަލަށް ރާއްޖޭގެ ހުރިހާ ރަށެއްގައި ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް ބެހެއްޓުމަށް ސޮއިކޮށްފިއެވެ.
ރައީސް އޮފީހުގައި މިއަދު ބޭއްވި ރަސްމިއްޔާތެއްގައި މިކަމާ ގުޅޭ އެއްބަސްވުމުގައި ބީއެމްއެލް އާއި އިކޮނޮމިކް މިނިސްޓްރީއާ ދެމެދު ވަނީ ސޮއިކޮށްފައެވެ. އެ މަޝްރޫއު ފައްޓަވައި ދެއްވުމުގެ ގޮތުން ރައީސް ޑރ. މުހައްމަދު މުއިއްޒު ވަނީ އދ. އޮމަދޫގައި އޭޓީއެމްގެ ހިދުމަތް ފައްޓަވައި ދެއްވައިފައެވެ.
މިއާއެކު، ބީއެމްއެލްގެ އޭޓީއެމްގެ އަދަދު 150 އަށް ވަނީ އަރައިފައެވެ.
ބީއެމްއެލްގެ ސީއީއޯ މުހައްމަދު ޝަރީފު ވިދާޅުވީ އެ ބޭންކުން މިހާތަނަށް ރާއްޖޭގެ 90 ރަށެއްގައި އޭޓީއެމް ބަހައްޓާފައިވާ ކަމަށެވެ. އެ ޕްރޮޖެކްޓްގެ ދަށުން އޭޓީއެމްތައް ބަހައްޓާނީ، ދެ ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގައި 17 ރަށެއްގައި އޭޓީއެމް ބަހައްޓާނެއެވެ.
ދެވަނަ ފިޔަވަހީގައި ބަހައްޓާ އޭޓީއެމްއާ އެކުގައި އަންނަ އަހަރުގެ ނިޔަލަށް ޖުމްލަ 103 އޭޓީއެމް ބަހައްޓާނެއެވެ.
އެއާއެކު، ބީއެމްއެލްގެ އޭޓީއެމްގެ އަދަދު 250 އަށް އިތުރުވާނެއެވެ. ރާއްޖޭގެ ކޮންމެ ރަށެއްގައި ބީއެމްއެލްގެ އޭޓީއެމްއެއް ގާއިމުކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
ޝަރީފް ވިދާޅުވީ މި ފެށޭ މަޝްރޫއުގައި ބީއެމްއެލްއަކީ މުހިންމު ބައިވެރިއެއް ކަމުގައި ވެގެން ދިއުމަކީ ލިބޭ ވަރަށް ބޮޑު އުފަލެއް ކަމަށެވެ.
ޝަރީފް ވިދާޅުވީ ކޮންމެ ރަށަކުން އޭރުން ފައިސާ ނެގުމާއި ޖަމާކުރުމާއި އެކައުންޓްތަކަށް ފައިސާ ޓްރާންސްފާކުރުމާއި ލޯނަށާއި ކްރެޑިން ކާޑަށް ފައިސާ ދެއްކުންފަދަ މުހިންމު ހިދުމަތްތައް ލިބިގެންދާނެ ކަމަށެވެ.
