ރާއްޖޭގެ ހުރިހާ އަތޮޅެއްގައި ފިއުލް ސްޓޯރޭޖް ގާއިމުކޮށް، އެސްޓީއޯ އިން ތެޔޮ ވިއްކާ އަގުގައި ތެޔޮ ފޯރުކޮށްދިނުމަށް ފިއުލް ސްޓޯރޭޖް ގާއިމުކުރުމުގެ މަޝްރޫއު މިއަދު އިފުތިތާހު ކޮށްފިއެވެ.

ރައީސް އޮފީހުގައި މިއަދު ބޭއްވި ރަސްމިއްޔާތެއްގައި އެ މަޝްރޫއު އިފްތިތާހުކޮށް ދެއްވީ ރައީސް ޑރ. މުހައްމަދު މުއިއްޒެވެ.

ރާއްޖޭގެ ކޮންމެ އަތޮޅެއްގައި އެސްޓީއޯ ރޭޓުން މަސްވެރިންނަށާއި، އާންމު ރައްޔިތުންނަށް ތެޔޮ ފޯރުކޮށްދިނުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ. އެ ވައުދު ފުއްދުމަށް ސަރުކާރުން އަންނަނީ ގިނަ މަސައްކަތްތަކެއް ވެސް ކުރަމުންނެވެ.

އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވީ މި މަޝްރޫއު ފެށުމުގެ ކުރިން ދިރާސާއެއް ކޮށްފައިވާނެ ކަމަށެވެ. އަދި އެންމެ ބޮޑަށް މަސްވެރިން ހަރަކާތްތެރިވަނީ މާލެ ސަރަހައްދުގައި ކަމަށްވާތީ މިއަހަރުގެ ޖޫން މަހުގެ ތެރޭގައި ހުޅުމާލޭގެ ފިއުލް ސަޕްލައި ޝެޑުން މަސްވެރިންނަށް އެސްޓީއޯގެ ރޭޓުން ތެޔޮ ވިއްކަން ފަށާފައިވާ ކަމަށް އޭނާ ވިދާޅުވިއެވެ. ހަތަރު ފިޔަވައްސަކަށް ބަހާލައިގެން ކުރިއަށްގެންދާ އެ މަޝްރޫއުގެ ދެވަނަ ފިޔަވަހީގެ ދަށުން އަންނަ އަހަރުގެ ފެބްރުއަރީ މަހު ތިން ރަށެއްގައި މި ފެސިލިޓީ ގާއިމުކުރާނެ ކަމަށް އޭނާ ވިދާޅުވިއެވެ.

އަދި އަންނަ އޮކްޓޯބަރު މަހު ފަސް ރަށެއްގައި މި ސެޓަޕް ގާއިމުކުރުމަށް ހަމަޖެހިފައިވާ އިރު، ބާކީ 11 ރަށުގައި ސެޓަޕްތައް ގާއިމްކޮށް ނިންމާނީ ޖެނުއަރީ 2026 ގައި ކަމަށް ޝިމާދު ވިދާޅުވިއެވެ.

ފިއުލް ސްޓޯރޭޖް ފެސިލިޓީ ސެޓަޕް ހަދަނީ:

1- ހުޅުމާލެ

2- ޅ. ފެލިވަރު

3- ގއ. ކޫއްޑޫ

4- ސ. ހުޅުމީދޫ

5- ހއ. އިހަވަންދޫ

6- ހދ. ހަނިމާދޫ

7- ފ. ނިލަންދޫ

8- ގދ. ފަރެސްމާތޮޑާ،

9- ފުވައްމުލައް

10- ށ. މިލަންދޫ

11- ރ. ދުވާފަރު

12- ބ. ތުޅާދޫ

13- އއ. މަތިވެރި

14- އދ. މާމިގިލީ

15- އދ. މަހިބަދޫ

16- ވ. ފެލިދޫ

17- މ. މުލައް

18- ދ. ކުޑަހުވަދޫ

19- ތ. ހިރިލަންދޫ

20- ލ.. ގަން

21- ނ. މަނަދޫ

ޝިމާދު ވިދާޅުވީ މަސްދޯނިފަހަރު ގިނަ އަދަދަކަށް ހަރަކާތްތެރިވާ ފެލިވަރާއި ކޫއްޑު އަށް މިހާރު ވެސް ހެޔޮ އަގުގައި ތެޔޮ ފޯރުކޮށްދޭ ކަމަށެވެ. މި ތަންތަނުގައި ވެސް އެސްޓީއޯ ސެޓަޕް ގާއިމުކޮށް، އެސްޓީއޯ ރޭޓުގައި ތެޔޮ ފޯރުކޮށްދިނުމަށް މިނިސްޓްރީތަކުގެ އެއްބާރުލުން ބޭނުންވާ ކަމަށް އޭނާ ވިދާޅުވިއެވެ.