އެންޓި ކޮރަޕްޝަން ކޮމިޝަނާއި އިލެކްޝަންސް ކޮމިޝަންގެ ރައީސުން އައްޔަން ކުރުމުގެ އިޚްތިޔާރު ރައީސުލްޖުމްހޫރިއްޔާއަށް ދިނުމަށް ހުށަހަޅާފައިވާ ދެ ބިލު މިއަދު ރައްޔިތުންގެ މަޖިލީހުން ވަނީ ބަލައިގަނެފައެވެ.
މަޖިލީހުގެ މިއަދުގެ ޖަލްސާގައި މި ދެ ބިލަށް ވަކިވަކިން ނެގުނު ވޯޓުގައި، އޭސީސީގެ ގާނޫނަށް އިސްލާހު ގެނައުމުގެ ބިލް ބަލައިގަތުމަށް 60 މެންބަރުން ތާއީދުކުރި އިރު، ފަސް މެންބަރުން ވަނީ އިދިކޮޅަށް ވޯޓުދެއްވާފައެވެ. ހަމައެފަދައިން އިލެކްޝަންސް ކޮމިޝަނުގެ ގާނޫނަށް އިސްލާހު ގެނައުމުގެ ބިލަށްވެސް 60 މެންބަރުން ތާއީދުކުރި އިރު، އިދިކޮޅަށް ވޯޓުދެއްވީ ހަ މެންބަރުންނެވެ. މި ދެ ބިލު އިތުރަށް ދިރާސާކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައެވެ.
މިހާރު ޢަމަލުކުރެވޭ ގާނޫނުގައިވާ ގޮތުން، މި ދެ ކޮމިޝަނުގެ ރައީސުން ޢައްޔަންކުރެވެނީ ކޮމިޝަނުގެ މެންބަރުންގެ މެދުގައި ނަގާ ވޯޓަކުންނެވެ. ނަމަވެސް އައު އިސްލާހުގެ ދަށުން، ކޮމިޝަންތަކުގެ ރައީސުން ޢައްޔަންކުރުމަށް ކޮމިޝަނުގެ މެންބަރުންގެ ތެރެއިން މެންބަރެއްގެ ނަން ހުށަހަޅާނީ ރައީސުލްޖުމްހޫރިއްޔާއެވެ. އަދި މި ނަން ފާސްކުރުމަށް މަޖިލީހުގެ ޖަލްސާއެއް ބޭއްވުމަށްފަހު، އެ މަޤާމުތަކުން އިސްތިއުފާދޭން ހުށަހަޅަންޖެހޭނީވެސް ރައީސުލްޖުމްހޫރިއްޔާއަށެވެ.
