ސަރުކާރުން އިޢުލާންކޮށްފައިވާ ގޮތުގައި، އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަކުރުމުގެ މަސައްކަތުގެ ތެރެއިން އޮކްޓޯބަރު މަހުގެ ނިޔަލަށް 248 ސިޔާސީ މުވައްޒަފުން ވަޒީފާއިން ވަކިކޮށްފައިވާކަން ސަރުކާރުން ހާމަކޮށްފިއެވެ. މި މަޢުލޫމާތު ހިއްސާކުރެއްވީ ރައީސް އޮފީހުގެ އިސް ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއް މެދުވެރިކޮށެވެ.
އަދި ހީނާ ވަނީ ސިޔާސީ މުވައްޒަފުންގެ މަސައްކަތުގެ ފެންވަރު ވަޒަންކުރާނެ އައު ނިޒާމެއް ތަޢާރަފުކުރުމަށް ކެބިނެޓުން ނިންމަވާފައިވާ ކަމަށާއި، މި ނިޒާމަށް އަމަލުކުރަން ވަރަށް އަވަހަށް ފަށާނެ ކަމަށް ވިދާޅުވެފައެވެ. މި ނިޒާމަކީ ސަރުކާރުގެ ޚަރަދުތައް ކުޑަކުރުމަށާއި ސަރުކާރު ހިންގުމުގެ ނިޒާމު ހަރުދަނާކުރުމަށް އެޅޭ އިތުރު ފިޔަވަޅެއްކަމަށްވެސް ހީނާ ވިދާޅުވެފައި ވެއެވެ.
އިޤްތިޞާދީ ރިފޯމް އެޖެންޑާގެ ދަށުން މުވައްޒަފުން މަދުކުރުމުގެ މަސައްކަތް ފެށިގެން އައީ މިދިޔަ އޮކްޓޯބަރު 15 ގައި ރައީސް ޑރ. މުޙައްމަދު މުޢިއްޒު ކުރެއްވި އިޢުލާނަކާ ގުޅިގެންނެވެ. އެގޮތުން ހަތް ސްޓޭޓް ވަޒީރުންނާއި، 43 ނައިބު ވަޒީރުންނާއި، 109 ސީނިއަރ ޕޮލިޓިކަލް ޑިރެކްޓަރުންނާއި އަދި 69 ޕޮލިޓިކަލް ޑިރެކްޓަރުން ހިމެނޭ ގޮތަށް ޖުމްލަ 228 މުވައްޒަފުން ވަކިކުރުމަށް ނިންމެވިއެވެ. މި ނިންމެވުމުގެ ސަބަބުން މަހަކު 5.714 މިލިއަން ރުފިޔާ ދައުލަތުގެ ބަޖެޓަށް ސަލާމަތްކުރެވޭނެ ކަމަށް ރައީސް ވިދާޅުވެފައިވެއެވެ.
މިހާރު އޮކްޓޯބަރު މަހުގެ ނިޔަލަށް ވަކިކޮށްފައިވާ މުވައްޒަފުންގެ އަދަދު ވަނީ 248 އަށް އަރާފައިކަމަށް ސަރުކާރުން ބުނެފައި ވެއެވެ.
