ދުނިޔޭގެ ދަރަނިބޮޑު ގައުމުތަކަށް އެހީތެރިވުމަށް ބައިނަލްއަޤްވާމީ މާލީ އިދާރާތަކުން އިތުރު މަސައްކަތްތަކެއް ކުރަންޖެހޭ ކަމަށް މަރުކަޒީ ބޭންކުގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
މުނައްވަރު މިހެން ވިދާޅުވީ ވޮޝިންގްޓަންގައި މިހާރު ކުރިއަށްދާ ވޯލްޑް ބޭންކް އަދި އައިއެމްއެފްގެ އަހަރީ ބައްދަލުވުމުގައި ވާހަކަފުޅު ދައްކަވަމުންނެވެ.
ގަވަރުނަރު ފާހަގަކުރެއްވި ގޮތުގައި، ތަރައްޤީވަމުން އަންނަ އިޤްތިޞާދުތަކުގެ ތެރެއިން ތިންބައިކުޅަ ދެބައި ގައުމުތަކަކީ މިވަގުތު ބޮޑެތި ދަރަނިތަކެއް އުފުލަމުންދާ ގައުމުތަކެވެ. މިކަމަށް ހައްލެއް ހޯދުމަށްޓަކައި ކުދި ޖަޒީރާ ގައުމުތަކުގެ ޚާއްޞަ ބޭނުންތަކަށް އިތުރަށް ސަމާލުކަން ދޭންޖެހެއެވެ. އަދި ބޮޑަށް ދަރަނިވެރިވެފައިވާ ގައުމުތަކަށް އެހީތެރިވުމަށް ވޯލްޑް ބޭންކާއި އައިއެމްއެފް އަދި އެހެނިހެން ބަހުއްޤައުމީ ބޭންކުތަކުން ހަރުދަނާ ފިޔަވަޅުތަކެއް އަޅަންޖެހެއެވެ.
މޫސުމަށް އަންނަ ބަދަލުތަކާ ގުޅޭގޮތުން ވާހަކަދައްކަވަމުން، މިކަމުގެ އެންމެ ބޮޑު އަސަރެއް ކުރަނީ ރާއްޖެ ފަދަ ކުދި ގައުމުތަކަށްކަން ފާހަގަކުރެއްވިއެވެ. މިގޮތުން، 2028 ވަނަ އަހަރާ ހަމައަށް ދިވެހިރާއްޖޭގައި 33 އިންސައްތަ ކަރަންޓް އިއާދަކުރުވަނިވި ހަކަތައިން އުފެއްދުމަށް ރޭވިފައިވާކަން ވިދާޅުވިއެވެ. މި މަޝްރޫޢަށް 1.3 ބިލިއަން ޑޮލަރު ބޭނުންވާއިރު، މިހާތަނަށް ހިލޭ އެހީގެ ގޮތުގައި ލިބިފައިވަނީ އެންމެ 13 އިންސައްތައެވެ.
އިއާދަކުރުވަނިވި ހަކަތައަށް ބަދަލުވުމުން މޫސުމީ ބަދަލުތަކުގެ އަސަރުތަކަށް ހޭނުމުގެ އިތުރުން، ތެލަށް ކުރަންޖެހޭ ޚަރަދު ކުޑަވެ، ބޭރު ފައިސާ ރައްކާކުރެވޭނެކަން ވެސް ގަވަރުނަރު ފާހަގަކުރެއްވިއެވެ. ބައްދަލުވުމުގެ ރިޔާސަތު މިއަހަރު ބަލަހައްޓަނީ ދިވެހިރާއްޖެއިން ކަމަށްވުމާއެކު، ގަވަރުނަރުގެ ދަތުރުފުޅުގެ ޚަރަދުތައް ކުރަނީ އައިއެމްއެފުންކަން މަރުކަޒީ ބޭންކުން ބަޔާންކުރިއެވެ.
