ޑެވެލޮޕްމެންޓް ބޭންކް އޮފް މޯލްޑިވްސް (ޑީބީއެމްއެލް) އަށް މުވައްޒަފުން ހޯދުމުގެ މަސައްކަތް ފަށައިފިއެވެ. މިމަސައްކަތް ފަށާފައިވަނީ އެމްއެމްއޭއިން މި ބޭންކް ހިންގުމުގެ ލައިސަންސް ދިނުމާ ގުޅިގެންނެވެ. ސަރުކާރުގެ އަމާޒަކީ މި އަހަރު ނިމުމުގެ ކުރިން މި ބޭންކުން ޚިދުމަތް ދޭން ފެށުމެވެ.

އެމްއެމްއޭއިން ލައިސަންސް ދީފައިވަނީ 2025 ވަނަ އަހަރުގެ އޮކްޓޯބަރު 12 ގެ ކުރިން ބޭންކުގެ ޚިދުމަތްތައް ފެށުމަށް ޝަރުތުކޮށްފައެވެ. މި ބޭންކަކީ ސަރުކާރުގެ ސައްތައިން ސައްތަ ހިއްސާ އޮންނަ ބޭންކެކެވެ.

ޑެވެލޮޕްމެންޓް ބޭންކުގެ މައިގަނޑު މަޤްޞަދަކީ ރާއްޖޭގެ އެހެނިހެން މާލީ މުއައްސަސާތަކާއި، ބައިނަލްއަޤްވާމީ މާލީ މުއައްސަސާތަކާއި، އަދި އިންވެސްޓަރުންނާ ގުޅިގެން، ތަރައްޤީގެ މަޝްރޫޢުތަކަށް ބޭނުންވާ ފައިސާ ރާއްޖެއަށް ފަހިކުރުމެވެ.

މި ބޭންކުގެ މައި އަމާޒުތަކުގެ ތެރޭގައި ހަކަތަ، ކާބޯތަކެތީގެ ޔަޤީންކަން، އަގުތައް ހިފެހެއްޓުން، ވަޒަންވެރިކަމާއި ބޯހިޔާވަހިކަން، ތިމާވެށި ހިމާޔަތްކުރުން، ފަތުރުވެރިކަމާއި ވައިގެ ދަތުރުފަތުރު، އަދި ކަނޑުގެ މަންފާއާއި ކަނޑާ ގުޅުންހުރި އިޤްތިޞާދީ ޙަރަކާތްތައް ހިމެނެއެވެ.

މީގެ އިތުރުން، މި ބޭންކު މެދުވެރިކޮށް ރާއްޖެއަށް ބޭރުގެ ސީދާ އިންވެސްޓްމަންޓްތައް އިތުރުކޮށް، ރާއްޖޭގެ މާލީ ނިޒާމުން ލިބެންހުރި ޑޮލަރުގެ އަދަދު އިތުރުކުރެވޭނެ ކަމަށް ވުޒާރާއިން އުންމީދުކުރެއެވެ.