ބޮލީވުޑްގެ ސުޕަސްޓާ ޝާހްރުކް ހާނާއި އޭނާގެ ދަރިފުޅު ސުހާނާ ހާން އެކުގައި ފެނިގެންދާ އެކްޝަން ތުރިލާ "ކިންގް" ގެ މުހިންމު ޝޫޓިން ޝެޑިއުލެއްގެ މަސައްކަތް މިހާރު ބާރަށް ކުރިއަށް ދެއެވެ. ސުޖޯއި ގޯޝް ޑައިރެކްޓްކުރާ މި ފިލްމަކީ ބައްޕައާއި ދަރިފުޅު ފުރަތަމަ ފަހަރަށް ސިލްވަރ ސްކްރީނުގައި ގުޅިގެން ފެނިގެންދާ ފިލްމު ކަމުން، ފޭނުންގެ ސަމާލުކަން ވަނީ ވަރަށް ބޮޑަށް މި ފިލްމަށް ޖެހިފައެވެ.
ރިޕޯޓުތަކުގައި ބުނާ ގޮތުގައި މި ޝެޑިއުލްގައި ގިނައިން ނަގަމުން މިދަނީ ސްޓަންޓްތަކާއި ނުރައްކާތެރި އެކްޝަން މަންޒަރުތަކެވެ. މިކަމަށްޓަކައި ދެ ތަރިން ވެސް ބޭރުގެ ސްޓަންޓް ޓީމުތަކާއެކު ތަމްރީނު ހޯދާފައިވެއެވެ. ފިލްމުގައި ސުހާނާ އަދާކުރަނީ ނުރައްކާތަކާ ކުރިމަތިލާ ހިތްވަރުގަދަ ޒުވާނެއްގެ ރޯލު ކަމަށާއި، ޝާހްރުކް ފެނިގެންދާނީ އޭނާ ރައްކާތެރިކުރުމަށް ހަނގުރާމަކުރާ ތަޖުރިބާކާރު މެންޓަރެއްގެ ގޮތުގައި ކަމަށް ބުނެއެވެ. އެކްޝަނާއެކު އާއިލީ އިހްސާސްތަކާއި އަސަރުގަދަ ގުޅުންތައް ވެސް ފިލްމުގައި ހިމެނޭނެ ކަމަށް ޕްރޮޑަކްޝަން ޓީމުން ބުނެއެވެ.
"ޕަތާން" އާއި "ޖަވާން" ގެ ކާމިޔާބީއަށް ފަހު ޝާހްރުކް އެނބުރި އެކްޝަނަށް އަންނަ މި ފިލްމުގެ ޝޫޓިން، އިންޑިއާއާއި ބޭރުގެ ގައުމުތަކުގައި ކުރިއަށް ގެންދާނެއެވެ. ބޮޑު ބަޖެޓަކުން އުފައްދާ "ކިންގް" އަކީ ބޮކްސް އޮފީހުގައި އާ ރެކޯޑުތަކެއް ހިންގާނެ ފިލްމެއްގެ ގޮތުގައި ފާހަގަކުރެވެއެވެ.
ކޮމެންޓު ފޮނުވާ