ބޭރު ފައިސާ މާރުކުރުމާ ބެހޭ ގަވާއިދުތަކާ ހިލާފަށް މާލޭގައި ފުޅާ މިންވަރަކަށް ފައިސާ މާރުކުރުމުގެ ހިދުމަތް ދެމުން އައި "އެމްއެސް ފައިނޭންސް ކަރަންސީ އެކްސްޗޭންޖް ޕްރައިވެޓް ލިމިޓެޑް" އަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން 500،000 ރުފިޔާގެ ޖޫރިމަނާއެއް ކުރުމާއެކު، އެ ކުންފުނީގެ ލައިސަންސްވެސް ހިފަހައްޓައިފިއެވެ.
މި ފިޔަވަޅު އެޅިކަން އެމްއެމްއޭއިން އާންމުކުރީ މިރޭ ނެރުނު ބަޔާނެއްގައެވެ. އެ ބަޔާނުގައި އެމްއެމްއޭއިން ހަނދާންކޮށްދީފައިވަނީ، ރާއްޖޭގައި ކުރެވޭ ބޭރު ފައިސާގެ ކޮންމެ މުއާމަލާތެއްވެސް ކުރަންޖެހޭނީ ގާނޫނާއި ގަވާއިދުތަކުގެ ދާއިރާގެ ތެރެއިން ކަމަށާއި، މި ދާއިރާގެ ހުރިހާ ވިޔަފާރިއެއްވެސް އެ އުސޫލުތަކަށް ފުރިހަމައަށް ތަބާވާން ޖެހޭނެ ކަމަށެވެ.
ފައިސާ މާރުކުރުމުގެ ބާޒާރު ރަނގަޅު ގޮތުގައި ހިނގާނެ ގޮތް ހަމަޖެއްސުމަށް، ގަވާއިދު މުޚާލިފުކުރާ ފަރާތްތައް ދެނެގަނެ، ތަންފީޒީ އިދާރާތަކާ ގުޅިގެން އެފަދަ ފަރާތްތަކާމެދު ފަސްނުޖެހި ފިޔަވަޅު އަޅަމުން ގެންދާނެ ކަމަށްވެސް އެމްއެމްއޭއިން ބުނެފައިވެއެވެ.
ކޮމެންޓު ފޮނުވާ