ބޭރުފައިސާގެ ގަވާއިދަށް ގެނެވުނު އިޞްލާޙުތަކަކީ ރާއްޖޭގެ ބޭންކިންގ ނިޒާމު ކުރިއެރުވުމަށް ކޮންމެހެން ބޭނުންވާ ބަދަލުތަކެއް ކަމުގައި މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަދު މުނައްވަރު ވިދާޅުވެއްޖެއެވެ. މުނައްވަރު މިހެން ވިދާޅުވީ ޤައުމީ ޔުނިވަރސިޓީގެ ދަރިވަރުންނަށް އަމާޒުކޮށްގެން އެމްއެމްއޭއިން ބޭއްވި ޕެނަލް ޑިސްކަޝަނެއްގައި ވާހަކަ ދައްކަވަމުންނެވެ. މި ބައްދަލުވުމުގައި އެމްއެމްއޭގެ އިސް ވެރިން ވަނީ ބޭރުފައިސާގެ ގަވާއިދަށާއި މަނީ ޗޭންޖަރުންގެ ގަވާއިދަށް ގެނެވުނު ބަދަލުތަކާ ބެހޭ މަޢުލޫމާތު ހިއްސާކުރައްވާފައެވެ.
ގަވަރުނަރު މުނައްވަރު ފާހަގަކުރެއްވި ގޮތުގައި، ރާއްޖެއަށް އަހަރަކު ވަންނަ 4.5 ބިލިއަން ޑޮލަރުގެ ތެރެއިން ޓެކްސްއާއި އެހެނިހެން ގޮތްގޮތުން މަރުކަޒީ ބޭންކަށް ލިބެނީ އެންމެ 23 އިންސައްތައެވެ. އެމަނިކުފާނު ވިދާޅުވީ، ރާއްޖެއަށް ވަންނަ ޑޮލަރުގެ ތެރެއިން ނިޒާމުގެ ތެރެއަށް ނުވަދެ "ނުރަސްމީ ބާޒާރަށް" ދޫވާ އަދަދު މަދުކުރެވިއްޖެނަމަ، ދިވެހި ރުފިޔާއަށް އޮންނަ ޑިމާންޑް އިތުރުވާނެ ކަމަށެވެ. އަދި މިއީ ގަވާއިދަށް ބަދަލު ގެނައުމުގެ އެއް މަޤްޞަދު ކަމުގައިވެސް ފާހަގަކުރެއްވިއެވެ.
ގަވަރުނަރު އިތުރަށް ވިދާޅުވީ، މި ގަވާއިދަށް ގިނަ ވިޔަފާރިތަކުން ތާއީދުކުރި ނަމަވެސް، ފައިސާ ބޭންކަށް މާރުކުރުމާ ގުޅޭގޮތުން ބައެއް ފަރާތްތަކުން ސުވާލު އުފައްދާ ކަމަށެވެ. އެމަނިކުފާނު ފާހަގަކުރެއްވި ގޮތުގައި، ރާއްޖޭގެ ބޭންކުތަކުގައި ފަތުރުވެރިކަމުގެ ޞިނާޢަތުގެ ޑިމާންޑާ އެއްވަރަށް ބޭރުފައިސާ ދޫކުރެވޭނެ ޤާބިލުކަމެއް ނެތެވެ. އެހެންކަމުން، ބޭރުގެ ބޭންކުތަކުން ފައިސާ ހޯދައިގެން އެ މަސައްކަތް ކުރަން މަޖުބޫރުވެފައިވާ ކަމަށް ގަވަރުނަރު ވިދާޅުވިއެވެ.
ގަވަރުނަރު މުނައްވަރު ސުވާލު އުފެއްދެވީ، ރާއްޖޭގެ ބޭންކިންގ އިންޑަސްޓްރީ މިހާ ނާޒުކު ޙާލަތެއްގައި ދޫކޮށްލަންވީތޯއެވެ. އޭނާ ވިދާޅުވި ގޮތުގައި، ރާއްޖެއަށް އަހަރަކު ވަންނަ 4.5 ބިލިއަން ޑޮލަރުގެ ތެރެއިން ރާއްޖޭގެ ބޭންކިންގ އިންޑަސްޓްރީއަށް ޖަމާކުރެވިފައިވަނީ ގާތްގަނޑަކަށް 2 ބިލިއަން ޑޮލަރެވެ. ބޭންކަށް ބޭރުފައިސާ ގެނައުމުން ބޭންކިންގ ނިޒާމު ކުރިއަރާނެ ކަމަށް ގަވަރުނަރު ޤަބޫލުކުރައްވައެވެ.
އެމްއެމްއޭއިން ބޭރުފައިސާގެ ގަވާއިދަށް ގެނައި ބަދަލާއެކު، ފަތުރުވެރިކަމުން އާމްދަނީ ލިބޭ، މީރާގައި ރަޖިސްޓަރީކޮށްފައިވާ ހުރިހާ ފަރާތަކުންވެސް ލިބޭ އާމްދަނީ ބޭންކަށް ޖަމާކުރުން ލާޒިމްވެއެވެ. ގްރީން ޓެކްސް ދައްކާ ފަރާތްތަކުގެ ތެރެއިން ރިސޯޓުތަކާއި ސަފާރީ އުޅަނދުތަކުން ކޮންމެ ފަތުރުވެރިއަކަށް 500 ޑޮލަރު، އަދި ގެސްޓްހައުސްތަކުން 25 ޑޮލަރު ބޭންކަށް މާރުކުރަން ޖެހެއެވެ. އެމްއެމްއޭއިން ވަނީ މިކަމަށް ވިޔަފާރިތަކަށް 3 މަސްދުވަހުގެ މުއްދަތެއް ދީފައެވެ. އަދި މި ބަދަލުގެ ސަބަބުން ވިޔަފާރި ހިންގުމަށް އެހާ ބޮޑު ދަތިތަކެއް ނުވާނެ ކަމަށް އެމްއެމްއޭއިން ޤަބޫލުކުރައްވައެވެ.
