އައްޑޫ ސިޓީ ހިތަދޫ ފިހާރަކަަށް ވަދެ ވަޅިއަކުން ބިރުދައްކަައި، ފޭރުނު މައްސަލައިގައި އިތުރު މީހަކު ހައްޔަރުކޮށްފިއެވެ.
ސޭޓަށް ބިރު ދައްކާ މަންޒަރު ފެންނަ ސީސީޓީވީ ފުޓޭޖެއް ސޯޝަލް މީޑިއާގައި ދައުރުވެފައިވާ އިރު، ވީޑިއޯ އިން ފެންނަނީ ދެ މީހަކު ފިހާރައިގެ ތެރޭގައި އުޅޭ ތަނެވެ. އެ ތަނުން އެކަކު ލަޓިބުރިއެއް ފާޑު އެއްޗެއް ހިފައިގެން އައިސް ސޭޓަށް ބިރު ދައްކާ ފޭރޭ މަންޒަރު ފެނެއެވެ. އަދި ދެވަނަ މީހާ އަތުގައި އޮތް ވަޅި ނަގައިގެން ފޭރޭ މަންޒަރު ފެނެއެވެ.
ބެލެވޭ ގޮތުގައި އެ ދެ މީހުން ވެސް ބިރު ދެއްކީ ބިދޭސީ މީހަކަށެވެ.
ވީޑިއޯ އިން ފަހުން ފެންނަ ގޮތުގައި ބިދޭސީ މީހާ ފަހުން ދެ މީހުން ފަހަތުން ދުއްވައިގަންނަ މަންޒަރު ވެސް ފެނެއެވެ.
އެ މީހުން ފޭރުމަށް ފަހު، ނުކުމެގެން ދާއިރު ދަގަނޑުބުރި އޮންނަނީ ފިހާރައިގެ ސޭޓުގެ އަތުގައެވެ.
މި މައްސަލައިގައި އެންމެ ފުރަތަމަ ހައްޔަރުކުރީ އުމުރުން 40 އަހަރުގެ ދިވެހި ފިރިހެނެކެވެ. އެމީހާގެ ބަންދާ މެދުގައި ގޮތެއް ނިންމުމަށް ކޯޓަށް ހާޒިރު ކުރުމުން ކޯޓުން ވަނީ 30 ދުވަހުގެ މުއްދަތެއް ޖަހައިފައެވެ.
ފުލުހުން ބުނީ މި މައްސަލައާ ގުޅިގެން ކޯޓު އަމުރެއްގެ ދަށުން އިތުރު މީހަކު ހައްޔަރުކޮށްފައިވާ ކަމަށެވެ. އެއީ 31 އަހަރުގެ ދިވެހި ފިރިހެނެއް ކަމަށް ފުލުހުން ބުންޏެވެ.
