މުޖުތަމަޢުގެ ދާޚިލީ ސަލާމަތާއި ރައްކާތެރިކަމާއި، ރަށްރަށުގައި ޕޮލިސް ސްޓޭޝަންތައް ގާއިމް ކުރުމަކީ މުހިންމު ކަމެއް ކަމުގައި ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ. ޝުޖާއު ވިދާޅުވީ ފުލުހުން ގުޅިގެން މަސައްކަތްކޮށްފިނަމަ ރާއްޖެ ކުށްމަދު ޤައުމަކަށް ހެދިދާނެކަމަށެވެ.
ސީޕީ ޝުޖާއު މިހެން ވިދާޅުވީ ބ. ކެންދޫ ޕޮލިސް ޕޯސްޓު ހުޅުވުމަށް އެ ރަށުގައި ބޭއްވުނު ރަސްމިއްޔާތުގައި ވާހަކަ ދައްކަވަމުންނެވެ.
ސީޕީ ވިދާޅުވި ގޮތުގައި ކެންދޫއަކީ ކުށްމަދު އަމާން މުޖުތަމަޢެއް އޮންނަ، އިޖުތިމާޢީ ގުޅުން ބަދަހި ރަށެކެވެ. އަދި ފުލުހުންނާއި ރައްޔިތުން ގުޅިގެން މަސައްކަތްކޮށްފިނަމަ މުޅި ޤައުމު ކުށްމަދު ތަނަކަށް ވެގެންދާނެ ކަމަށް އޭނާ ޔަޤީންކުރައްވާ ކަމަށް ވިދާޅުވިއެވެ.
މީހުން ދިރިއުޅޭ ކޮންމެ ރަށެއްގައި ފުލުހުންގެ ޚިދުމަތް ޤާއިމުކުރުމުގެ މުހިންމުކަން ފާހަގަކުރައްވަމުން ސީޕީ ވިދާޅުވީ، މުޖުތަމަޢުގެ ދާޚިލީ ސަލާމަތާއި ރައްކާތެރިކަމާއި، އަމަން އަމާންކަން ނެގެހެއްޓުމަށާއި، ޖިނާއީ ކުށްތައް ހުއްޓުވައި ތަޙްޤީޤުކޮށް، ޤާނޫނު ތަންފީޒުކުރުމަށް މިކަން މުހިންމު ކަމަށެވެ.
މިހާރު ދިވެހި ފުލުހުންގެ ޚިދުމަތުން ޢަމަލުކުރަމުންދާ މައިގަނޑު އަސާސަކީ ކުށް ވިޔަ ނުދިނުމަށް މުޖުތަމަޢާ ގުޅިގެން މަސައްކަތްކުރުން ކަމަށާއި، ކުށް ފާޅުވުމުގެ ކުރިން ކުށް އުފެދުމަށް ހުރި ހުރަސްތައް ނައްތާލުމަށް މަސައްކަތްކުރާ ކަމަށް ސީޕީ ވިދާޅުވިއެވެ. އަދި ރައްޔިތުންނާއި ފުލުހުން ގުޅިގެން ގިނަ މަސައްކަތްތަކެއް ކުރެވިގެންދާތަން ކެންދޫން ފެންނާނެ ކަމަށްވެސް އޭނާ ވިދާޅުވިއެވެ.
ފުލުހުންނަށް ޤާނޫނުއަސާސީންނާއި ޤާނޫނުތަކުން މަތިކޮށްފައިވާ ޒިންމާތައް ފުރިހަމަގޮތުގައި އަދާކުރުމަށް ބޭނުންވާ އާލާތްތަކާއި ވަސީލަތްތަކާއި ތަމްރީނުތައް ހޯދައިދިނުމަކީ އަމާޒެއް ކަމަށް ސީޕީ ވިދާޅުވިއެވެ. އަދި ފުލުހުންގެ މުއައްސަސާގެ ހިންގުން މިހާރަށްވުރެ ހަރުދަނާކޮށް، ރައްޔިތުންނަށް ފޯރުކޮށްދޭ ޚިދުމަތުގެ ފެންވަރު މަތިކޮށް ޚިދުމަތް ކުރިއެރުވުމަށް ބޭނުންވާ ބަދަލުތައް ގެންނަމުންދާ ކަމަށްވެސް އޭނާ ފާހަގަކުރެއްވިއެވެ.
