އުރީދޫއިން މިނިސްޓްރީ އޮފް ހެލްތަށް 16 މިލިއަން ރުފިޔާގެ މެޑިކަލް އިކްއިޕްމަންޓް ހަދިޔާކޮށްފިއެވެ.
މި ތަކެތި ރަމްޒީގޮތުން ހަވާލުކޮށްދެއްވީ ވެލާނާ އިންޓަނޭޝަނަލް އެއަރޕޯޓްގައި މިއަދު ބޭއްވުނު ރަސްމިއްޔާތެއްގައި އުރީދޫ ގްރޫޕްގެ މެނޭޖިންގ ޑައިރެކްޓަރ އަޒީޒް އަލް އުޘްމާން ފަޚުރޫއެވެ. މި އިކްއިޕްމަންޓްތަކަކީ އުރީދޫގެ އިޖްތިމާޢީ ޒިންމާގެ ދަށުން އެއަރ އެމްބިއުލާންސްއަށް ބޭނުންވާ ތަކެތިކަން ފާހަގަކޮށްލެވެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ހެލްތު އަބްދުﷲ ނާޘިމް އިބްރާހީމް ވިދާޅުވީ މި އިކްއިޕްމަންޓްތަކަކީ އިމަރޖެންސީގައި ޙާލުދެރަ ބަލިމީހުންނަށް އެންމެ ބޭނުންވާ ފަރުވާ ވަގުތުން ދިނުމަށް އެހީތެރިވެދޭނެ ތަކެތި ކަމަށެވެ. އަދި އުރީދޫގެ މި އެހީއަކީ ވިޔަފާރިތަކުން އިންސާނިއްޔަތުކަމަށް އިސްކަންދީގެން މަސައްކަތްކުރެވޭނެކަމުގެ ހެއްކެއްކަމަށާއި، މިއީ ކޯޕަރޭޓް ސޯޝަލް ރެސްޕޮންސިބިލިޓީގެ ގޯލްޑް ސްޓޭންޑަޑެއް ކަނޑައެޅުއްވި ކަމެއްގެ ގޮތުގައި މިނިސްޓަރު ފާހަގަކުރެއްވިއެވެ.
އުރީދޫ މޯލްޑިވްސްގެ މެނޭޖިންގ ޑިރެކްޓަރު އަދި ސީއީއޯ، ޙާލިދް އަލް-ހަމާދީ ވިދާޅުވީ ރައްޔިތުންނަށް ސިއްޙީ ފަރުވާ ފަސޭހައިން ލިބޭނެ ގޮތް ފަހިކޮށްދިނުމަށް ސަރުކާރުން ކުރައްވާ މަސައްކަތުގައި ބައިވެރިވުމަކީ އުރީދޫއިން އިސްކަމެއްދޭ ކަމެއްކަމަށެވެ. އަދި މި ތަކެތި ލިބުމުން އެއަރ އެމްބިއުލާންސްއިން ފޯރުކޮށްދޭ ޚިދުމަތުގެ ފެންވަރު މަތިވެގެންދާނެކަމަށް އެމަނިކުފާނު ފާހަގަކުރެއްވިއެވެ.
މި ރަސްމިއްޔާތުގައި އެއަރ އެމްބިއުލާންސްގެ 3D މޮޑަލްއެއް އޫރީދޫއިން ވަނީ މިނިސްޓަރ އަބްދުﷲ ނާޒިމް އިބްރާހިމަށް ހަދިޔާ ކުރައްވާފައެވެ.
އެއަރ އެމްބިއުލާންސްގެ ޚިދުމަތް ފެށިފައިވަނީ މިއަހަރުގެ މާރިޗް މަހުގެ އެއްވަނަ ދުވަހުކަން ފާހަގަކޮށްލެވެއެވެ.
