މޯލްޑިވްސް އިމިގްރޭޝަނުން ދ. އަތޮޅު ކައުންސިލާއެކު ބައްދަލުވުމެއް ބާއްވައި، ދިވެހި ޕާސްޕޯޓުގެ ޚިދުމަތް ދ. އަތޮޅުގައި ގާއިމްކުރުމާ ގުޅޭގޮތުން މަޝްވަރާކޮށްފިއެވެ. އިމިގްރޭޝަނުން މި ބައްދަލުވުމުގައި ފާހަގަކުރެއްވި ގޮތުގައި، އެ އިދާރާގެ އަމާޒަކީ މިއަހަރު ނިމުމުގެ ކުރިން މި ޚިދުމަތް ދ. އަތޮޅުން ފެށުމެވެ.
ރައީސުލްޖުމްހޫރިއްޔާގެ ވަޢުދާ އެއްގޮތަށް، ދިވެހި ޕާސްޕޯޓުގެ ޚިދުމަތް ރައްޔިތުންނަށް ލުއިފަސޭހަކަމާއެކު ފޯރުކޮށްދިނުމަކީ އިމިގްރޭޝަނުގެ އަމާޒެއް ކަމަށް އެ އިދާރާއިން ބުނެފައިވެއެވެ. އަދި ކުރިއަށް އޮތްތަނުގައި އިތުރު އަތޮޅުތަކަށްވެސް މި ޚިދުމަތް ފުޅާކުރުމަށް ރޭވިފައިވާ ކަމަށް އިމިގްރޭޝަނުން ހާމަކޮށްފައިވެއެވެ.
މި މުހިންމު ބައްދަލުވުމުގައި އިމިގްރޭޝަންގެ ފަރާތުން ކޮންޓްރޯލަރ ޖެނެރަލް މުޙައްމަދު ޝަމްޢާން ވަޙީދާއި ޑެޕިއުޓީ ކޮންޓްރޯލަރ އަޙްމަދު އަޝްފާނުގެ އިތުރުން އެހެނިހެން އިސް އޮފިޝަލުން ބައިވެރިވެވަޑައިގެންނެވިއެވެ. ކައުންސިލްގެ ފަރާތުން ބައިވެރިވެވަޑައިގެންނެވީ ކައުންސިލްގެ މެންބަރުންނާއި ކުޑަހުވަދޫ ދާއިރާގެ މެންބަރު ޙުސައިން ޙަމީދެވެ. މި ބައްދަލުވުމަކީ ދ. އަތޮޅުގެ ރައްޔިތުންނަށް ޕާސްޕޯޓުގެ ޚިދުމަތް ފަސޭހައިން ލިބިގަތުމަށް މަގުފަހިވެގެންދާނެ މުހިންމު ފިޔަވަޅެއް ކަމުގައި ބެލެވެއެވެ.
