ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އަނބިކަނބަލުން ސާޖިދާ މުޙައްމަދު އިންޑިއާއަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން ތާޖް މަހަލްއަށް ޒިޔާރަތްކުރައްވައިފިއެވެ.
އިންޑިއާ ސަރުކާރުން އެ ދެކަނބަލުންނަށް ތާޖް މަހަލްގެ ޕްރައިވެޓް ޓުއަރެއް ހަމަޖައްސަވައިދެއްވި އިރު، އޭގެ ތެރޭގައި އިމާރާތުގެ އެތެރެ ބެއްލެވުމުގެ އިތުރުން ކައިރީގައިވާ ފޯޓްތައް ބެއްލެވުމުގެ ފުރުސަތު ވެސް ލިބިވަޑައިގެންނެވިއެވެ. މީގެ އިތުރުން، ރައީސް މުޢިއްޒު ތާޖް މަހަލްގެ ވިޒިޓަރސް ފޮތުގައި ސޮއިކުރެއްވުމާއެކު، ހަނދާނީ ހަދިޔާއެއްގެ ގޮތުގައި ތާޖް މަހަލްގެ ރެޕްލިކާއެއް ވެސް އެ ދެކަނބަލުންނަށް އަރުވާފައިވެއެވެ.
މި ދަތުރުފުޅުގައި ރައީސް މުޢިއްޒު ވަނީ އިންޑިއާގެ އިސްވެރިންނާއެކު މުހިންމު ބައްދަލުވުންތަކެއް ބާއްވަވާފައެވެ. މި ގޮތުން ބޮޑުވަޒީރު ނަރެންދްރަ މޯދީ، ރައީސް ދްރައުޕަދީ މުރުމު، ނައިބު ރައީސް ޖަގްދީޕް ދަންކަރު، އަދި ޚާރިޖީ ވަޒީރު ޑރ. އެސް. ޖައިޝަންކަރާ ބައްދަލުކުރެއްވިއެވެ. މި ބައްދަލުވުންތަކުގެ ނަތީޖާއެއްގެ ގޮތުން، ދިވެހިރާއްޖެއާއި އިންޑިއާއާ ދެމެދު ގުޅުން އިތުރަށް ބަދަހިކުރުމަށް މުހިންމު އެއްބަސްވުންތަކެއްގައި ސޮއިކުރެވުނެވެ. އަދި އިންޑިއާގެ އެހީގައި ހިންގުނު ގިނަ މަޝްރޫޢުތަކެއް ދިވެހި ސަރުކާރާ ރަސްމީކޮށް ޙަވާލުކުރެވުނެވެ.
ރައީސް މުޢިއްޒުގެ މި ދަތުރުފުޅަކީ އިންޑިއާގެ ރައީސް މުރުމުގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ފުޅާކޮށް، އެކި ދާއިރާތަކުން އެއްބާރުލުން އިތުރުކުރުމަށް މަގުފަހިވެގެންދާނެ ކަމަށް ވަނީ ބެލެވިފައެވެ.
