ސަރަހައްދީ ރައްކާތެރިކަން ކަށަވަރުވެފައި އޮތުމަކީ އިޤްތިޞާދީ ކުރިއެރުމަށް މަގުފަހިވެގެންދާނެ ކަމެއް ކަމުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހިމް ހިލްމީ ވިދާޅުވެއްޖެއެވެ.
މޭޖަރ ޖެނެރަލް އިބްރާހިމް ހިލްމީ މިހެން ވިދާޅުވީ މޯލްޑިވްސް ސްޓްރެޓީޖިކް ޓްރޭޑް މެނޭޖްމަންޓް ފޯރަމް ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ. އެ ރަސްމިއްޔާތުގައި ވާހަކަފުޅު ދައްކަވަމުން، ރާއްޖެ އޮތް ސަރަހައްދަކީ ދުނިޔޭގެ ވިޔަފާރީގެ މައި މަގެއްކަން ފާހަގަކުރައްވައި، އޭގެ ތާރީޚީ މުހިންމުކަމަށް އަލިއަޅުވާލެއްވިއެވެ.
މޭޖަރ ޖެނެރަލް ހިލްމީ ވިދާޅުވީ މިފަދަ ފޯރަމެއްގެ ތެރެއިން ސަރަހައްދުގެ ރައްކާތެރިކަން ކަށަވަރުކުރުމަށް މުއައްސަސާތައް ގުޅިގެން މުހިންމު މަސައްކަތްތަކެއް ކުރެވިދާނެ ކަމަށެވެ. އަދި ދުނިޔޭގެ ވިޔަފާރިއަށް އަންނަ ބަދަލުތަކާއި ޤައުމުތަކުގެ މެދުގައި އަލަށް ޤާއިމްކުރެވޭ އެއްބަސްވުންތަކަށް އަޅުގަނޑުމެންގެ ނިޒާމުތައް އަހުލުވެރިކުރުމުގެ މުހިންމުކަން ފާހަގަކުރެއްވިއެވެ. މީގެ އިތުރުން، ތަންފީޒީ އިދާރާތަކުގެ ޤާބިލިއްޔަތުކަން އިތުރުކޮށް މީހުން ބިނާކުރަން ޖެހޭ ކަމަށްވެސް ވިދާޅުވިއެވެ.
ޗީފް އޮފް ޑިފެންސް ފޯސް އިތުރަށް ވިދާޅުވީ، ސަރަހައްދީ ރައްކާތެރިކަން ކަށަވަރުކުރެވިއްޖެނަމަ، އިންވެސްޓަރުންގެ މެދުގައި އިތުބާރު އުފެދި، އިޤްތިޞާދީ ކުރިއެރުމަށް މަގުފަހިވެގެންދާނެ ކަމަށެވެ.
މި ފޯރަމަކީ އެމެރިކާގެ ސަރުކާރުގެ އެހީތެރިކަމާއެކު މޯލްޑިވްސް ކަސްޓަމްސް ސާވިސްއިން ބާއްވާ ފޯރަމެކެވެ. މީގެ މަޤްޞަދަކީ ގެއްލުންދެނިވި ނުރައްކާތެރި ހަތިޔާރު ދައުރުވުން ހުއްޓުވުމަށް އދ. އިން ފާސްކޮށްފައިވާ ޤަރާރު ތަންފީޒު ކުރުމަށް ރާއްޖެއަށް އެޅިދާނެ އިސްތިރާޖީ ފިޔަވަޅުތަކާމެދު މަޝްވަރާކުރުމެވެ. މި ފޯރަމުގައި ތަންފީޒީ އިދާރާތަކުގެ އިތުރުން އެކި ވުޒާރާތަކާއި ބަންޑާރަ ނައިބުގެ އޮފީހުން ބައިވެރިވެއެވެ.
ދެ ދުވަހުގެ މުއްދަތަށް ކުރިއަށްދާ މި ފޯރަމުގެ ތެރެއިން ކުރެވޭ މަޝްވަރާތަކަށްފަހު، ރާއްޖޭގެ ދިފާޢީ ބާރު ހިމެނޭގޮތަށް ތަންފީޒީ އިދާރާތައް އެކުވެގެން ވޯކިންގ ގްރޫޕެއް އެކުލަވާލާނެއެވެ. ކަސްޓަމްސްއިން ބުނެފައިވާ ގޮތުގައި މި ވޯކިންގ ގްރޫޕުގެ މަޤްޞަދަކީ އދ. ޤަރާރު ތަންފީޒު ކުރުމަށް ރާއްޖޭގެ ޤާނޫނީ އޮނިގަނޑެއް އެކުލަވާލުމަށް ކުރަންޖެހޭ މަސައްކަތްތައް ކުރުމެވެ.
