މުދައްރިސުންނަކީ އުއްބައްތިތަކެއް ފަދަ ބައެއް ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ބައިނަލްއަޤްވާމީ މުދައްރިސުންގެ ދުވަހާ ގުޅިގެން "އެކްސް" ގައި ކުރެއްވި ޕޯސްޓެއްގައެވެ. އެ ބޭފުޅުންނަކީ އެހެން މީހުންނަށް އަލިކަން ދިނުމަށްޓަކާ އެތައް ހާސް ބައްތިއެއް ދިއްލައިދޭ ބައެއްގެ ގޮތުގައި ރައީސް މުދައްރިސުން ސިފަކުރެއްވިއެވެ. މި ދުވަސް ފާހަގަކުރަނީ ކޮންމެ އަހަރެއްގެ އޮކްޓޯބަރު 5 ވަނަ ދުވަހުއެވެ.
މި އަހަރުގެ މުދައްރިސުންގެ ދުވަސް ފާހަގަކުރުމާ ގުޅޭގޮތުން އެޑިއުކޭޝަން މިނިސްޓްރީން ވަނީ އައު އިރުޝާދުތަކެއް ނެރެފައެވެ. މީގެ ތެރޭގައި ދަރިވަރުންނާއި ބެލެނިވެރިން އަތުން ފައިސާ ނުނެގުމަށާއި، އަގުބޮޑު ހަފްލާތަކުގެ ބަދަލުގައި އިލްމީ އުފެއްދުންތެރި ހަރަކާތްތަކަށް އިސްކަންދިނުމަށް އަންގާފައިވެއެވެ. އަދި ޓީޗަރުންގެ ދުވަސް އޮކްޓޯބަރު 6 އިން 10 އާ ދެމެދު ފާހަގަކުރުމަށާއި، ހުރިހާ ހަރަކާތްތަކެއް އެއް ދުވަހެއްގެ ތެރޭގައި ނިންމުމަށް އަންގާފައިވެއެވެ.
މިނިސްޓްރީގެ އިރުޝާދުތަކުގައި އިތުރަށް ބަޔާންކޮށްފައިވަނީ، ކޮންމެ ދަންފަޅިއެއްގައިވެސް ހަރަކާތްތައް 45 މިނެޓަށްވުރެ ދިގުނުކުރުމަށާއި، ރަސްމީ ސެޝަން ދެ ގަޑިއިރަށްވުރެ ދިގުނުކުރުމަށެވެ. މީގެއިތުރުން ރަށުން ބޭރުގައި ހަރަކާތްތައް ނުބޭއްވުމަށާއި، ވަކިވަކި ޓީޗަރުންނަށް ދަރިވަރުންނާއި ބެލެނިވެރިންގެ ފަރާތުން ހަދިޔާ ނުދިނުމަށްވެސް އަންގާފައިވެއެވެ.
