ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް (ޑީބީއެމްއެލް) އަށް މި ހަފުތާ ތެރޭގައި ލައިސަންސް ދޫކުރެވޭނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
ދައުލަތުގެ މީޑިއާ މެދުވެރިކޮށް ރައްޔިތުންނަށް ބޭންކުގެ މައުލޫމާތު ދެއްވަމުން، ގަވަރުނަރު ވިދާޅުވީ ޑިވެލޮޕްމަންޓް ބޭންކަށް ލައިސަންސް ދިނުމަށް ބޭނުންވާ ދިރާސާތައް ނިމި، އެމްއެމްއޭގެ ބޯޑުން ވަނީ ލައިސަންސް ދޫކުރުމަށް ފާސްކޮށްފައި ކަމަށެވެ. އަދި ލައިސަންސް ދޫކުރުމާއެކު، ބޭންކުގެ މަސައްކަތް އަވަހަށް ފެށިގެންދާނެ ކަމަށް އުއްމީދުކުރައްވާ ކަމަށްވެސް އެމަނިކުފާނު ވިދާޅުވިއެވެ.
މި އައު ޑިވެލޮޕްމަންޓް ބޭންކް ގާއިމުކުރެވޭނީ މާލޭގެ ޗާންދަނީމަގާއި އަމީރު އަހުމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގްގެ ތިރީ ބައިގައެވެ. މިއީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ފުރިހަމަކުރުމުގެ ގޮތުން ގާއިމުކުރެވޭ ރާއްޖޭގެ ފުރަތަމަ ޑިވެލޮޕްމަންޓް ބޭންކެވެ.
ބޭންކުގެ އިސް މަޤާމުތަކަށް ބޭރުގެ ތަޖުރިބާކާރުން ވަނީ އައްޔަންކުރެވިފައެވެ. ސީއީއޯގެ މަޤާމަށް އިނގިރޭސިވިލާތުގެ ނޮއެލް ގްރެގާ ހަމަޖައްސާފައިވާއިރު، ޗެއާޕާސަންގެ މަގާމަށް ސިންގަޕޫރުގެ އަރޫނީ ގުނިޓެލެކީ ވަނީ ހަމަޖެހިފައެވެ. ޗެއާޕާސަން އަރޫނީއަކީ ބައިނަލްއަގްވާމީ މާލީ މާކެޓުގައި 25 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ މާލީ ދާއިރާގެ މާހިރެކެވެ.
