މުސްތަގުބަލުގެ ދަންމަރަކީ ހަމަހަމަކަމާއެކު، އެއްވެސް ކުއްޖަކު ބާކީ ނުކޮށް ފޯރުކޮށް ދެވޭ ތައުލީމު ކަމުގައި، ފަސްޓް ލޭޑީ މެޑަމް ސާޖިދާ މުހައްމަދު ވިދާޅު ވެއްޖެއެވެ.
އެކަމަނާ މިހެން ވިދާޅުވީ މިއަދު ސެންޓަރ ފޮރ ހަޔަރ ސެކަންޑަރީ އެޑިޔުކޭޝަންގައި ބޭއްވުނު 7 ވަނަ އިންޓަނޭޝަނަލް ޓީޗަރސް ކޮންފަރެންސްގެ ފެށުމުގެ ރަސްމިއްޔާތުގައި، 21 ވަނަ ޤަރުނުގައި ހަމަހަމަ ތަޢުލީމުގެ މުހިންމުކަން ފާހަގަކުރައްވާ ވާހަކަފުޅު ދައްކަވަމުންނެވެ.
"އެޑިޔުކޭޓް، އެމްޕަވަރ، އެލިވޭޓް: އިކުއިޓަބަލް އެޑިޔުކޭޝަން ފޯ 21ސްޓް ސެންޗަރީ އެޑިޔުކޭޝަން އެކްސެލެންސް" މި ތީމްގެ ދަށުން ބޭއްވުނު މި ކޮންފަރެންސްގައި ރާއްޖޭގެ އެކި ކަންކޮޅުތަކުން މުދައްރިސުންނާއި، ސިޔާސަތު އެކުލަވާލާ ފަރާތްތަކާއި، މަޞްލަޙަތުވެރިން ބައިވެރިވިއެވެ.
އެކަމަނާގެ ވާހަކަފުޅުގައި، އެއްވެސް ކުއްޖަކު ބާކީނުކޮށް، ހުރިހާ ކުދިންނަށް ފޯރުކޮށްދެވޭ ހިމެނުންތެރި ތަޢުލީމުގެ މުހިންމުކަން ފާހަގަކުރެއްވިއެވެ. "ތަޢުލީމުގައި ހަމަހަމަކަމާއި ހިމެނުންތެރިކަން ކަށަވަރުކުރުމަކީ އަޅުގަނޑުމެންގެ މަގު އަލިކޮށްދޭ އަލިކަމެއް" ކަމަށް ވިދާޅުވެ، ދިވެހިރާއްޖޭގައި މި އިލްތިޒާމުގެ ތާރީޚީ ބިންގާ ފާހަގަކުރެއްވިއެވެ.
މުދައްރިސުންގެ ދުޅަހެޔޮކަން އިތުރުކުރުމަށް ސަރުކާރުން ފަހުން ވެފައިވާ ވަޢުދުތަކަކީ މި ޚިޠާބުގެ މައިގަނޑު އެއް ބައެވެ. މި އިސްނެގުންތަކުގެ ތެރޭގައި މުދައްރިސުން ސްކޫލުގައި މަސައްކަތްކުރާ ގަޑިތައް ކަނޑައެޅުމާއި، އިދާރީ މަސައްކަތްތައް މަދުކުރުން ހިމެނެއެވެ. މި ކަންކަމުގެ މަޤްޞަދަކީ މުދައްރިސުންނަށް އެބޭފުޅުންގެ މައިގަނޑު މަސްއޫލިއްޔަތު ކަމުގައިވާ ކިޔަވައިދިނުމަށް އިތުރަށް ސަމާލުކަން ދެވޭނެގޮތް ހެދުމެވެ. މީގެ އިތުރުން، މުދައްރިސުންގެ ފަންނީ ކުރިއެރުމަށްޓަކައި ވަރކްޝޮޕްތަކާއި، ރިފްރެޝަރ ޕްރޮގްރާމްތަކާއި، ނަފްސާނީ ދުޅަހެޔޮކަމަށް އެހީތެރިވުމުގެ މުހިންމުކަން ފުރަތަމަ ކަނބަލުން ފާހަގަކުރެއްވިއެވެ.
ދިވެހިރާއްޖޭގެ ތަޢުލީމީ ނިޒާމަށް ކުރިމަތިވާ ހުރަސްތަކާއި ގޮންޖެހުންތައް، ޚާއްޞަކޮށް ރަށްރަށުގައި ހުރި ގޮންޖެހުންތައް ފާހަގަކުރައްވައި، އެކުގައި މަސައްކަތްކޮށްގެން އާ ގޮތްތައް ހޯދުމަށް ގޮވާލެއްވިއެވެ. އަދި ޖިއޮގްރަފިކަލް ހުރަސްތައް ފަހަނައަޅައި، ތަޢުލީމަށް ވާޞިލުވުމާއި، ކިޔަވައިދިނުމުގެ ގޮތްތަކާއި، ފުރުޞަތުތައް އިތުރުކުރުމުގައި ޓެކްނޮލޮޖީގެ ދައުރު ފަސްޓް ލޭޑީ ފާހަގަ ކުރަައްވާފައި ވެއެވެ.
ރަށްރަށުގައި މަސައްކަތްކުރައްވާ މުދައްރިސުންނަށް ޚާއްޞަ ޝުކުރެއް އަދާކުރައްވައި، އެބޭފުޅުންނަކީ ހަމައެކަނި މުދައްރިސުންގެ ގޮތުގައި ނޫން، މެންޓަރުންނާއި މުޖުތަމަޢުގެ ލީޑަރުންގެ ގޮތުގައި އަދާކުރާ ދައުރު ފާހަގަކުރެއްވިއެވެ.
ޚިޠާބު ދެއްވުމުގެ ކުރިން، ފުރަތަމަ މެޑަމް ސާޖިދާއަށް އެޑިޔުކޭޝަން މިނިސްޓަރު ޑރ. އިސްމާޢީލް ޝަފީޢު ހަނދާނީ ފިލައެއް އަރުވާފައިވެއެވެ.
މި ކޮންފަރެންސަކީ ދިވެހިރާއްޖެ ފަދަ ޖަޒީރާ ޤައުމަކަށް ދިމާވާ ޚާއްޞަ ގޮންޖެހުންތަކަށް ރިޢާޔަތްކޮށް، ހިމެނުންތެރި އަދި ހަމަހަމަ ތަޢުލީމީ ނިޒާމެއް އުފެއްދުމަށް ކުރެވޭ މަސައްކަތްތަކުގެ މުހިންމު ފިޔަވަޅެކެވެ.
