މި އަހަރުގެ ފުރަތަމަ އަށް މަސްދުވަހު ފުލުހުންގެ މަސްތުވާތަކެއްޗާ ދެކޮޅަށް ހިންގި ޙަރަކާތްތަކުގެ ނަތީޖާ ހާމަކޮށްފިއެވެ. މި މުއްދަތުގައި 158 ކިލޯއަށްވުރެ ގިނަ މަސްތުވާތަކެތި އަތުލައިގަނެވިފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ޖަނަވަރީ މަހުން ފެށިގެން އޮގަސްޓް މަހުގެ ނިޔަލަށް ޑްރަގް އެންފޯސްމަންޓް ޑިޕާޓްމަންޓުން ކުރި މަސައްކަތްތަކުގެ ތަފާސްހިސާބު މިއަދު ވަނީ ޢާންމުކޮށްފައެވެ. މި މުއްދަތުގައި 113 އޮޕަރޭޝަން ހިންގައި، 8،500 އަށްވުރެ ގިނަ މީހުން ބަލައި ފާސްކޮށް، 700 އަށްވުރެ ގިނަ މީހުން ހައްޔަރުކުރެވިފައިވެއެވެ.
އަތުލެވުނު ތަކެތީގެ ތެރޭގައި 158.8 ކިލޯއަށްވުރެ ގިނަ މަސްތުވާތަކެއްޗާއި 5،200 އަށްވުރެ ގިނަ ބަނގުރާ ފުޅި ހިމެނެއެވެ. މި ތަކެތީގެ މަގުމަތީ އަގު 282 މިލިއަން ރުފިޔާއަށްވުރެ އިތުރުވާ ކަމަށް ފުލުހުން ބުނެފައިވެއެވެ.
މީގެ އިތުރުން، މި މުއްދަތުގައި މަސްތުވާތަކެއްޗާ ގުޅުންހުރި 475 މައްސަލަ ހުށަހެޅި، އޭގެ ތެރެއިން 230 މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވިފައިވާކަން ފުލުހުންގެ ތަފާސްހިސާބުތަކުން ދައްކައެވެ.
އަދި 80 ބިދޭސީން އިމިގްރޭޝަނާ ހަވާލުކުރެވިފައިވާކަންވެސް ފާހަގަކޮށްފައިވެއެވެ.
