ހުރިހާ ސިއްހީ ހިދުމަތްތެރިންނަށް ބަލިމީހުންނަށް ހިދުމަތް ދޭއިރު މިހާރަށްވުރެ ރައްކާތެރިވުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ގޮވާލައްވައިފިއެވެ. ސާޖިދާ މިކަމަށް ގޮވާލެއްވީ އައްޑޫ ސިޓީގައި ބައިނަލްއަގުވާމީ ބަލި މީހުންގެ ރައްކާތެރިކަމުގެ ދުވަހާ ގުޅިގެން ބޭއްވުނު ހާއްސަ ކޮންފަރެންސެއްގައެވެ.
ފަސްޓް ލޭޑީ ސާޖިދާ ވިދާޅުވީ ސިއްހީ ހިދުމަތް ފޯރުކޮށްދިނުމުގައި ބަލި މީހާގެ ރައްކާތެރިކަމަށް ހާއްސަ ސަމާލުކަމެއް ދިނުމަށް ބޭނުންވާ އުސޫލުތަކާއި ޕްރޮސީޖާތައް ހަރުދަނާކުރުމާއެކު، މުޅި ސިއްހީ ނިޒާމް ވަރުގަދަކުރުމަކީ އެކަމަނާގެ އެދުމެއްކަމަށެވެ. އަދި މުވައްޒަފުން ތަމްރީނުކޮށް އަހުލުވެރިކުރުމުގެ މަސައްކަތްތައް ކުރިއަށް ގެންދިއުމަކީވެސް އެކަމަނާގެ އެދުމެއްކަމަށް ވިދާޅުވިއެވެ.
އިތުރަށް ވާހަކަފުޅު ދައްކަވަމުން، ބަލި މީހުންގެ ރައްކާތެރިކަމަށްޓަކައި އަލަށް ތައާރަފްކުރެވުނު ސްޓްރެޓީޖިކް ޕްލޭން ތަންފީޒުކުރުމާއި، ބަލިމީހާގެ ބަލި އަވަހަށް ދެނެގަތުމުގެ އިންތިޒާމްތައް ރޭވުމާއި، ބޭނުންވާ ބޭސްފަރުވާގެ ކަންކަން އަވަސްކުރުމުގެ މުހިންމުކަން ފާހަގަކުރެއްވިއެވެ. މިކަންކަމާއެކު ދާއިރާގެ މުވައްޒަފުން ރަނގަޅަށް ތަމްރީނުކުރެވިގެން ދިއުމަކީ ބަލި މީހާގެ ރައްކާތެރިކަން އިތުރަށް ޔަގީންވެގެންދާނެ ކަމެއްކަމަށް ސާޖިދާ ވިދާޅުވިއެވެ.
ފަސްޓް ލޭޑީ އިތުރަށް ވިދާޅުވީ ބަލިމީހާގެ ރައްކާތެރިކަމަށް މަސައްކަތްކުރުމަކީ މުޅި ސިއްހީ ނިޒާމުގައި ހަރަކާތްތެރިވާ އެންމެންގެ ޒިންމާއެއްކަމަށާއި، ކޮންމެ މީހަކުވެސް، ކޮންމެ ވަގުތެއްގައިވެސް މަސައްކަތްކުރަންވާނީ ބަލިމީހާގެ ރައްކާތެރިކަން ކަށަވަރުކުރުމަށްކަމަށެވެ. މިއަހަރުގެ ބަލިމީހުންގެ ރައްކާތެރިކަމުގެ ދުވަހުގެ ޝިއާރަކީ "ބަލިމީހާގެ ރައްކާތެރިކަމަށްޓަކައި ބަލި ދެނެގަތުމުގެ ގޮތްތައް ހަރުދަނާކޮށް ފެންވަރު މަތިކުރުން"
މިއެވެ. އައްޑޫގައި ބޭއްވުނު މި ކޮންފަރެންސްއަކީ މި ފެންވަރުގައި މާލެއިން ބޭރުގައި ބޭއްވުނު ފުރަތަމަ ކޮންފަރެންސްކަން ފާހަގަކޮށްލެވެއެވެ.
