މާފުށީ ޖަލުގައި ބަންދުކޮށްފައި ހުއްޓާ ދަންޖެހިގެން މަރުވެފައި އޮއްވައި ފެނުނު މީހާގެ ހަށިގަނޑު ޕޯސްޓްމޯޓަމް ހަދުމަށްޓަކައި ހުކުރު ދުވަހު އިންޑިއާއަށް ފޮނުވާލެވުނެވެ. މިއީ ޖަލުގައި މަރުވާ މީހުންގެ ޕޯސްޓްމޯޓަމް ހެދުން ލާޒިމްކުރުމަށްފަހު ހަދާ ފުރަތަމަ ޕޯސްޓްމޯޓަމްކަން ފާހަގަކޮށްލެވެއެވެ.
މަރުވި މީހާއަކީ އުމުރުން 62 އަހަރުގެ މާލޭ ގ. އެއްތެޔޮމާގޭ، އަބްދުލްގަނީ އިސްމާއިލެވެ. އޭނާއަކީ 15 އަހަރުގެ އަންހެންކުއްޖަކާއެކު ގަދަކަމުން ބަދުއަޚްލާޤީ ޢަމަލު ހިންގި ކަމުގެ ތުހުމަތުގައި، ޝަރީޢަތް ނިމެންދެން މިދިޔަ މާރިޗު މަހުން ފެށިގެން މާފުށީ ޖަލުގައި ބަންދުކޮށްފައި ހުރި މީހެކެވެ. މިދިޔަ ހަފުތާގެ އަންގާރަ ދުވަހު އޭނާ ދަންޖެހިގެން މަރުވެފައި އޮއްވައި ފެނުނު ކަމަށް ހޯމް މިނިސްޓްރީން ކަށަވަރުކޮށްދީފައިވެއެވެ. އަދި ފުލުހުން ބުނެފައިވަނީ މި މައްސަލަ ތަޙްޤީޤު ކުރަމުންދާ ކަމަށެވެ.
ސަރުކާރުން ޖަލުގައި މަރުވާ މީހުންގެ ޕޯސްޓްމޯޓަމް ހެދުން ލާޒިމްކުރުމަށް ނިންމީ މިދިޔަ ޖޫން މަހުއެވެ. މި ނިންމުމަށް އައީ މާފުށީ ޖަލުގައި ބަންދުކޮށްފައި ހުއްޓާ ށ. ފުނަދޫ، ޒަމާނީ ވިލާ، މުޙައްމަދު ޖަމީލު މަރުވުމާ ގުޅިގެންނެވެ. އޭނާ މަރުވީ ޖަލުގެ އޮފިސަރުން އަނިޔާކޮށްގެން ކަމަށް ތުހުމަތުކުރެވުނެވެ.
ހޯމްލޭންޑް މިނިސްޓަރު އަލީ އިޙްސާން ވިދާޅުވެފައިވަނީ މީގެ ފަހުން ޖަލުގައި މަރުވާ ކޮންމެ މީހެއްގެ ޕޯސްޓްމޯޓަމް ހަދާނެ ކަމަށެވެ. މިހާރު އިންޑިއާއަށް ފޮނުވާލެވުނު ހަށިގަނޑުގެ ޕޯސްޓްމޯޓަމްއަކީ އެ ނިންމުމަށްފަހު ހަދާ ފުރަތަމަ ޕޯސްޓްމޯޓަމްއެވެ.
