ޔުނައިޓެޑް ނޭޝަންސް (ޔޫއެން) އިން ބޭއްވި ފަބްލިކް ޑިޕްލޮމަސީއާ ގުޅޭ ތަމްރީނު ޕްރޮގްރާމެއްގައި ކުރީގެ ފޮރިން މިނިސްޓަރު އަދި އދ. ގެ އާންމު މަޖިލީހުގެ ކުރީގެ ރައީސް ޝާހިދު ވާހަކަފުޅު ދައްކަވައިފިއެވެ. އެކްސްގައި ޝާހިދު ކުރެއްވި ޕޯސްޓެއްގައި ވިދާޅުވެފައިވަނީ މި ފުރުސަތަކީ އޭނާއަށް ލިބުނު ޝަރަފެއް ކަމަށެވެ.
މި ބައްދަލުވުމުގައި ޝާހިދު ވަނީ އޭނާގެ ތަޖުރިބާތަކާއި، ބައިނަލްއަޤްވާމީ މައިދާނުގައި ޑިޕްލޮމަސީއާ ގުޅޭ މަޢުލޫމާތު ކޯހުގެ ބައިވެރިންނާ ހިއްސާކުރައްވާފައެވެ. އަދި މި ބައްދަލުވުމުން ދުނިޔޭގައި ކުރިއަށް ނިކުތުމަށް އަޒުމު ކަނޑައަޅާފައިވާ ލީޑަރުންނާ މެދު އުންމީދު އާވެފައިވާ ކަމަށް ވެސް ވިދާޅުވެފައިވެއެވެ.
ކުރީގެ ފޮރިން މިނިސްޓަރެއްގެ ހައިސިއްޔަތުންނާއި އދ. ގެ އާންމު މަޖިލީހުގެ ރައީސްކަން ކުރެއްވި ދުވަސްވަރު، ޝާހިދު ވަނީ ބައިނަލްއަޤްވާމީ މައިދާނުގައި ރާއްޖެ ތަމްސީލުކުރެއްވުމާއި ގުޅުންތައް ބަދަހިކުރެއްވުމުގައި ގިނަގުނަ މަސައްކަތްތަކެއް ކުރައްވާފައެވެ.
