ޣައްޒާގެ ހަނގުރާމައިގެ ނޭދެވޭ އަސަރުތަކާ ގުޅޭގޮތުން އެމައްސަލަ ބައިނަލްއަޤްވާމީ މުޖުތަމަޢުގެ ސަމާލުކަން ގެނައުމަށް ރައީސް މުއިއްޒު ގޮވާލައްވައިފިއެވެ.
ރޭ އެމެރިކާގެ ޕްރިންސްޓަން ޔުނިވަރސިޓީގެ ޕަބްލިކް އެންޑް އިންޓަނޭޝަނަލް އެފެއާޒް ސްކޫލުގައި ދެއްވި ތަޤްރީރުގައި، ރައީސް ވަނީ ޣައްޒާގެ ރައްޔިތުންނަށް ކުރަމުންދާ އަނިޔާތަކާ ދެކޮޅަށް ޔުނިވަރސިޓީތަކުން އަޑުއުފުލުމުގެ މުހިންމުކަން ފާހަގަކުރައްވާފައެވެ. މިއަދުގެ ދުނިޔޭގައި ފެންނަމުންދާ ބޭއިންސާފާއި އަނިޔާވެރިކަމުގެ ހިތި ޙަޤީޤަތް އެންމެން ޤަބޫލުކުރަންޖެހޭ ކަމަށް ރައީސް ވިދާޅުވިއެވެ.
މީގެ އިތުރުން، އެކުވެރި ދައުލަތްތަކުގެ ޖަމިއްޔާ، ޔޫއެންގެ ސަލާމަތީ މަޖިލީހުގައި ދެއްވި ބަޔާނުގައި، ރައީސް ވަނީ އދ. ގެ ސަލާމަތީ މަޖިލީހުގެ ދާއިމީ މެންބަރުންނަށް ލިބިފައިވާ ވީޓޯ ކުރުމުގެ ބާރު އުވާލުމަށާއި، އދ. ގެ ސަލާމަތީ މަޖިލީހުގެ އޮނިގަނޑަށް މުހިންމު އިޞްލާޙުތަކެއް ގެނައުމަށް ގޮވާލައްވާފައެވެ. ސުލްޙަ ބެލެހެއްޓުމުގައި އދ. ގެ ސަލާމަތީ މަޖިލީހަށް ހަވާލުކުރެވިފައިވާ ޒިންމާ އަދާނުކުރެވޭތީ، އދ. ގެ ނިޒާމަށް ދުނިޔެއިން ކުރާ އިތުބާރު ގެއްލެމުންދާކަން ރައީސް ފާހަގަކުރެއްވިއެވެ.
ޣައްޒާގައި ހިނގަމުންދާ ހަމަނުޖެހުންތަކަށް އިޝާރާތްކުރައްވައި، ރައީސުލްޖުމްހޫރިއްޔާ ވިދާޅުވެފައިވަނީ، ސަލާމަތީ މަޖިލީހުގެ ކުރިމަތީގައި ނަސްލު ނައްތާލުމުގެ ޢަމަލުތައް ހިނގަމުންދާއިރުވެސް، ބައިނަލްއަޤްވާމީ ޤާނޫނު ނެގެހެއްޓުމުގައި އެ މަޖިލިސް ނުކުޅެދިފައިވާ ކަމަށެވެ. ފަލަސްތީނުގެ ނަސްލު ނައްތާލުމަށް އިސްރާއީލުން ހިންގާ ޤަތުލުޢާންމު ހުއްޓުވުމަށް ސަލާމަތީ މަޖިލީހަށް ލިބިފައިވާ ބާރު ކަނޑުވާލާ، އަދަބު ނުދެވި އަނިޔާވެރި އިސްތިޢުމާރު ދެމެހެއްޓުމަށް އިސްރާއީލަށް ފުރުޞަތު ފަހިވަނީ ވީޓޯގެ ބާރުން ކަމަށް ރައީސް ވަނީ ފާހަގަކުރައްވާފައެވެ.
