އިއްޔެ މެންދުރު ހުޅުމާލޭގައި ހިނގި ހާދިސާއެއްގައި މަސްތުވާތަކެތި ގެންގުޅުނު ކަމަށް ތުހުމަތުކުރެވޭ މީހަކު ފުލުހުންގެ އަމުރަށް ނުކިޔަމަންތެރިވުމާ ގުޅިގެން ހައްޔަރުކޮށްފިއެވެ. ފުލުހުން މަޢުލޫމާތު ދެއްވާފައިވާ ގޮތުގައި، މި ހާދިސާ ހިނގާފައިވަނީ ހުޅުމާލޭ ފްލެޓް 4 ގެ ކައިރީގައެވެ. އެ ސަރަހައްދުގައި ޕެޓްރޯލްކުރަމުންދިޔަ ފުލުހުންނަށް ފެނުނީ ހިނގާފައިދިޔަ މީހަކު މަސްތުވާތަކެތި ކަމަށް ޝައްކުކުރެވޭ ތިން ސެލޯފިން ކޮޅެއް އެއްލާލި މަންޒަރެވެ.
ފުލުހުން އެ ފަރާތް ހުއްޓުވައި ސުވާލުކޮށް ބޮޑީ ޗެކްކުރަން އެދުމުން، އެ ފަރާތުން ގަދަހަދައި ފުލުހުންގެ ދައުރު އަދާކުރުމަށް ހުރަސްއަޅާފައިވާތީ، ފުލުހުން ބާރުގެ ބޭނުންކޮށްގެން އޭނާ ބަންދަށް ގެންގޮސްފައިވެއެވެ. ހައްޔަރުކުރެވުނު ފަރާތަކީ މާލެ، މ. ސަލާސާ، މޫސާ ފާޒިލް (31 އަހަރު) ކަމަށް ފުލުހުން ވަނީ ހާމަކޮށްފައެވެ.
މި މައްސަލަ މިހާރު ވަނީ ތަޙުޤީޤީ މަރުޙަލާގައެވެ. ފުލުހުންގެ ފަރާތުން މި މައްސަލައާ ގުޅޭ އިތުރު ތަފްސީލުތައް އަދި ހާމަކޮށްފައެއް ނުވެއެވެ. މި ބާވަތުގެ މައްސަލަތަކުގައި ފުލުހުންނަށް އެއްބާރުލުން ދިނުމަކީ ޤާނޫނީ ޒިންމާއެއްކަން ފާހަގަކޮށް، މުޖުތަމަޢުގެ ސަލާމަތާއި ރައްކާތެރިކަމަށްޓަކައި މިފަދަ ޙާލަތްތަކުގައި ރައްޔިތުން ފުލުހުންނަށް އެހީތެރިވުމުގެ މުހިންމުކަން ފުލުހުން ވަނީ ފާހަގަ ކޮށްފައެވެ.
