ހަޔަޓް ހޮޓެލްސް ކޯޕަރޭޝަނުން ސިންގްހައިޔީއާ އެކު ރާއްޖޭގައި އައު ލަގްޒަރީ ރިސޯޓެއް ތަރައްގީކުރުމަށް އެއްބަސްވުމެއްގައި ސޮއިކޮށްފައެވެ. "ހަޔަޓް ރީޖެންސީ ސަމަރަފުށި މޯލްޑިވްސް" ގެ ނަމުގައި ހުޅުވުމަށް ހަމަޖެހިފައިވާ މި ރިސޯޓަކީ އޯލް-ވިލާ ކޮންސެޕްޓްގެ މައްޗަށް ބިނާކުރެވޭ ތަނެކެވެ.
2027 ވަނަ އަހަރުގެ ފަހުކޮޅު ހުޅުވުމަށް ރޭވިފައިވާ މި ރިސޯޓަކީ ހަޔަޓް ރީޖެންސީ ބްރޭންޑްގެ ދަށުން ރާއްޖޭގައި ހުޅުވޭ ތިންވަނަ ރިސޯޓެވެ. މިހާރުވެސް ހަޔަޓް އިން ރާއްޖޭގައި "ޕާކް ހަޔަޓް މޯލްޑިވްސް ހަދަހާ" އާއި "އަލީލާ ކޮތައިފަރު މޯލްޑިވްސް" ހިންގަމުން ގެންދެއެވެ.
އުތުރު މާލެ އަތޮޅުގައި ޤާއިމުކުރެވޭ މި ރިސޯޓަށް ވާސިލުވުމަށް ވެލާނާ އިންޓަނޭޝަނަލް އެއަރޕޯޓުން ސްޕީޑްބޯޓުގައި އެންމެ 25 މިނެޓު ހޭދަވާނެއެވެ. މި ސަރަހައްދަކީ ޑައިވިންގ އާއި ސްނޯކެލިންގ އަށް މަޝްހޫރުވެފައިވާ، އަދި ޕާސްޓާ ޕޮއިންޓް އަދި ސުލްޓާންސް ފަދަ ބައިނަލްއަޤްވާމީ ފެންވަރުގެ ސާފިންގ ސްޕޮޓްތަކާ ކައިރި ހިސާބެކެވެ.
24 އޭކަރުގެ ބިމެއްގައި ތަރައްޤީކުރެވޭ މި ރިސޯޓުގައި 130 ލަގްޒަރީ ވިލާ ހުންނާނެއެވެ. މީގެ ތެރޭގައި ބީޗްފްރަންޓް، ޓްރީޓޮޕް އަދި އޯވަރވޯޓަރ ވިލާތައް ހިމެނޭއިރު، ކޮންމެ ވިލާއެއްގައިވެސް އަމިއްލަ ފެންވަޅެއް ހުންނާނެއެވެ. ޕާކް ޕްލަސް އެސޯސިއޭޓްސްއިން ޑިޒައިންކުރާ މި ރިސޯޓުގައި ދިވެހި ޢިމާރާތްކުރުމުގެ ވައްޓަފާޅިއާއި މޮޑަން، ލައިޓް އަދި ގުދުރަތީ ކުލަތައް އެއްކޮށްލެވިފައިވާނެއެވެ.
މި ރިސޯޓުގައި ސަންސެޓް ބާރއަކާއި، ބީޗް ކްލަބަކާއި، ޖަޕާނުގެ ކާނާއަށް ޚާއްޞަ ރެސްޓޯރަންޓަކާއި، މުޅި ދުވަހަށް ހުޅުވިފައި ހުންނަ ކެއުމުގެ ތަނެއް ހިމެނޭނެއެވެ. މީގެ އިތުރުން، ވޯލްޑް އޮފް ހަޔަޓް ގްލޯބަލިސްޓުންނާއި ކްލަބް އެކްސެސް ލިބިފައިވާ މެހުމާނުންނަށް ރީޖެންސީ ކްލަބް ލައުންޖްގެ ޚާއްޞަ ޚިދުމަތްތައް ލިބޭނެއެވެ.
ހުރިހާ އުމުރުފުރައެއްގެ މެހުމާނުންނަށް އަމާޒުކޮށް، މި ރިސޯޓުގައި ކުޑަކުދިންގެ ކްލަބަކާއި، ކަނޑުގެ ދިރުންތަކާއި ފީނުމުގެ މަރުކަޒަކާއި، ދުޅަހެޔޮ ސިއްޙަތަށް ޚާއްޞަ ޕެވިލިއަނަކާއި، ޔޯގާ ކުރުމަށް ޚާއްޞަ ސަރަހައްދަކާއި، އަދި 8 ކޮޓަރި ހިމެނޭ ސްޕާއެއްވެސް ހުންނާނެއެވެ. މި ރިސޯޓު ހުޅުވުމުން ރާއްޖޭގެ ޓޫރިޒަމް ދާއިރާއަށް އިތުރު ފުރިހަމަކަމެއް ލިބިގެންދާނެއެވެ.
