މިމަހުގެ 24 އަދި 25 ވަނަ ދުވަހު އިމިގްރޭޝަންގެ ޓާސްކު ފޯސްއިން، ހުޅުމާލޭގެ ފޭސް 1 ގައި ހިންގަމުންދާ 6 ކެފޭ އަދި ހޮޓާ ބަލައި ފާސްކޮށްފިއެވެ. މި ޚާއްޞަ އޮޕަރޭޝަނުގައި ގަވާއިދާ ޚިލާފަށް އުޅެމުންދިޔަ 16 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ.
މީގެ އިތުރުން، ފާސްކުރެވުނު ތަންތަނުގެ ތެރެއިން، 3 ކެފޭއަކުން ނަގަންޖެހޭ ބައެއް ހުއްދަތައް ނުނަގައި ހިންގަމުންދިއުމާ ގުޅިގެން، ކަމާ ގުޅުންހުރި އިދާރާތަކުން ވަނީ އެ ތަންތަނަށް ނޯޓިސް ދީފައެވެ.
މި އޮޕަރޭޝަން ކާމިޔާބުކަމާއެކު ކުރިއަށް ގެންދެވުނީ އާންމުންގެ ފަރާތުން ލިބުނު އެއްބާރުލުމާ އެކުގައި ކަމަށް ޓާސްކު ފޯސްއިން ބުނެފައިވެއެވެ. އަދި މިކަމުގައި އާންމުން ދެއްވި އެއްބާރުލެއްވުމަށް ޝުކުރު އަދާކޮށްފައިވެއެވެ.
މި ފަދަ ރެއިޑުތައް ކުރިއަށް އޮތް ތަނުގައިވެސް ކުރިއަށް ގެންދާނެ ކަމަށް އިދާރާތަކުން މަޢުލޫމާތު ދީފައިވެއެވެ. އަދި ގަވާއިދާ އެއްގޮތަށް ވިޔަފާރިތައް ހިންގުމަށާއި، ބިދޭސީން ގެންގުޅުމުގައި ޤާނޫނާއި ގަވާއިދުތަކަށް ޙުރުމަތްތެރިކޮށް ހިތުމަށް ވިޔަފާރިވެރިންނަށް އިލްތިމާސްކޮށްފައިވެއެވެ.
