ރައީސް ޑރ. މުހައްމަދު މުއިއްޒު އަވަހާރަކޮށްލާނެ ކަމަށް ބުނެ ސޯޝަލް މީޑިއާގައި ދެވުނު އިންޒާރާ ގުޅިގެން ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން އެ ޢަމަލު ގަދައަޅައި ކުށްވެރިކޮށްފިއެވެ. ފޭސްބުކް މެދުވެރިކޮށް ދެވުނު މި އިންޒާރާ ގުޅޭ މައްސަލަ މިހާރު ދަނީ ފުލުހުންގެ ތަޙުޤީޤުގެ ދަށުގައެވެ.
ޕީޕީއެމްއިން ނެރުނު ބަޔާނުގައި ވިދާޅުވެފައިވަނީ މިއީ ދައުލަތުގެ ތަޙުޤީޤީ އިދާރާތަކުން އިސްކަންދީގެން ބަލަންޖެހޭ މައްސަލައެއް ކަމަށެވެ. އަދި މި މައްސަލައިގައި އަވަސް އަދި ހަރުދަނާ ތަޙުޤީޤެއް ކުރިއަށް ގެންދިއުމަށް އެ ފަރާތްތަކަށް އިލްތިމާސްކޮށްފައިވެއެވެ.
މީގެއިތުރުން، ރައީސްގެ ސަލާމަތާއި ރައްކާތެރިކަން ކަށަވަރުކުރުމުގެ ޒިންމާ އަދާކުރުމުގައި ކަމާބެހޭ ދައުލަތުގެ އިދާރާތަކުން އެންމެ އެކަށީގެންވާ ގޮތެއްގައި މަސައްކަތްކުރާނެކަމަށް ޕީޕީއެމްއިން ޔަޤީންކަން ފާޅުކޮށްފައިވެއެވެ. މި ހާދިސާއަކީ ޤައުމުގެ އެންމެ މަތީ ވެރިޔާގެ ރައްކާތެރިކަމަށް ނުރައްކާވެދާނެ ކަމެއްގެ ގޮތުގައި ބަލައި، ކަމާބެހޭ ފަރާތްތަކުން މިކަމަށް ސަމާލުކަން ދޭންޖެހޭކަން ފާހަގަކޮށްފައިވެއެވެ.
