ރެސްޕިރޭޓަރީ ސިންސިޓިއަލް ވައިރަސް (އާރްއެސްވީ) އަކީ ނޭވާލާ ނިޒާމަށް ޖެހޭ ބައްޔެއް ކަމަށާއި، އެ ބަލި މިހާރު ހަލުވިކަމާއެކު ފެތުރެމުންދާތީ، ޚާއްޞަ ސަމާލުކަމެއް ދިނުމަށް އެޗްޕީއޭ އިން ވަނީ އެދެފއެވެ. މި ބަލި މައިގަނޑު ގޮތެއްގައި ފެތުރެމުންދަނީ ކުޑަކުދިންގެ މެދުގައި ކަމަށް އެ އެޖެންސީން ފާހަގަކޮށްފައިވެއެވެ. އަދި މި ކަންބޮޑުވުން ހިއްސާކުރުމާއެކު، ބަލި ފެތުރުން ހުއްޓުވުމަށް އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށް އާންމުންނަށް އިލްތިމާސްކޮށްފައިވެއެވެ.
އެޗްޕީއޭ އިން އާންމުންނަށް އަންގާފައިވާ ގޮތުގައި، ގިނަގިނައިން އަތް ދޮވުމާއި، މީހުން އެއްވެ އުޅޭ ތަންތަނަށް ނުދިއުމަކީ މުހިންމު ކަމެކެވެ. އަދި ރޯގާ، ކެއްސުން، ނޭވާލާން އުނދަގޫވުން، އަދި ބުރަކަށީގައި ރިއްސުން ފަދަ އަލާމާތްތައް ފެނިއްޖެނަމަ ވަގުތުން ފަރުވާ ހޯދުމަށް އިރުޝާދު ދީފައިވެއެވެ.
މި ބަލި އާންމުކޮށް ޖެހެނީ ބެކްޓީރިއާ ނުވަތަ ވައިރަސްތަކުގެ ސަބަބުންނެވެ. ގައިންގަޔަށް އަރާ ބައްޔަކަށްވުމާއެކު، ކެއްސާ ކިނބިހި އަޅާއިރު ވައިރަސް ނުފެތުރޭނެ ގޮތަށް އަމަލުކުރުމަކީ މުހިންމު ކަމެކެވެ. މި ބަލީގެ އަލާމާތްތަކުގެ ތެރޭގައި ކިނބިހި އެޅުން، ނޭފަތުން ފެން އައުން، ހުން އައުން، ކެއްސުން އަދި ބަނޑުހައިހޫނުކަން ދަށްވުން ހިމެނެއެވެ. ޚާއްޞަކޮށް ތުއްތު ކުދިންގެ މެދުގައި ރުޅިގަދަވުމާއި، ވަރުބަލިވުމާއި، އަދި ނޭވާލާން އުނދަގޫވުން ފަދަ އަލާމާތްތައް ފެންނަން ފަށައެވެ.
މި ބަލީގެ އަސަރު އެންމެ ބޮޑަށް ކުރަނީ ގައިގެ ބާރު ދެރަވެފައިވާ އުމުރުން ދުވަސްވީ މީހުންނާއި ތުއްތު ކުދިންނަށެވެ. ގިނަ މީހުންގެ ކިބައިން ބަލީގެ އަލާމާތްތައް ފެންނަނީ ހަތަރު ދުވަހާއި ހަ ދުވަހާ ދެމެދުގެ މުއްދަތަކަށެވެ. އަދި މި ބަލި އެއްކޮށް ފަސޭހަވުމަށް ދެ ހަފްތާއެއްހާ ދުވަސް ނަގާނެއެވެ.
އާރްއެސްވީ އަށް ފަރުވާ ކުރަނީ އާދައިގެ ހުމަށް ފަރުވާ ކުރާ އުސޫލުންނެވެ. އެހެންކަމުން، ބަލީގެ އަލާމާތްތައް ފެނިއްޖެނަމަ ލަސްނުކޮށް ޑޮކްޓަރަށް ދައްކައި، ޑޮކްޓަރުގެ ލަފަޔާއެކު ބޭސް ބޭނުންކުރުން މުހިންމެވެ. މީގެ އިތުރުން، ގިނައިން ދިޔާ ތަކެތި ބޭނުންކުރުމާއި، ބަލި ފެތުރުނަ ނުދިނުމަށް ގޭގައި މަޑުކޮށް، އެހެން މީހުންނާ ގުޅުން މަދުކުރުމަކީވެސް މުހިންމު ކަމެކެވެ.
