ރާއްޖެއަށް މަސްތުވާތަކެތި އެެތެރެވުން ހުއްޓުވަން ފުލުހުން ކުއްތާތަކާ އެކުގައި ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ހަރަކާތްތެރިވާން ފަށައިފިއެވެ.
ފުލުހުން ބުނީ ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށް، ދިވެހި ފުލުހުންގެ ޚިދުމަތާއި މޯލްޑިވްސް ކަސްޓަމް ސަރވިސް އަދި މޯލްޑިވްސް އެއާޕޯސްޓް ކޮމްޕެނީ ގުޅިގެން ހާއްސަ މަސައްކަތްތަކެއް ކުރަމުންދާ ކަމަށެވެ.
މި މަސައްކަތުގެ ތެރެއިން ޑޯގް ސްކޮޑް އެއާޕޯޓުގައި ހަރަކާތްތެރިވަމުންދާ ކަމަށް ފުލުހުން ބުންޏެވެ.
މިކަމުގެ އިތުރު ތަފްސީލެއް ފުލުހުން ނުދީ، ފުލުހުން ވަނީ އެއާޕޯޓުގައި ފުލުހުން ކުއްތާތަކާ އެކުގައި ހަރަކާތްތެރިވާ ފޮޓޯތަކެއް އާންމުކޮށްފައެވެ. އެ ފޮޓޯގައި ފެންނަނީ ކުއްތާތަކެއް ނެރެގެން ފޮށިގަނޑުތަކެއް ބަލައި ފާސް ކުރަމުންދާ ތަނެވެ.
މި ފަހުން ރާއްޖެއަށް މަސްތުވާތަކެތި އެތެރެ ކުރާ ކަމުގެ ތުހުމަތުގައި ގިނަ ބަޔަކު ވަނީ ހައްޔަރުކުރަން ފަށައިފައެވެ. އޭގެ ތެރޭގައި ދުނިޔޭގެ އެކި ގައުމުތަކަށް މަސްތުވާތަކެތި ފޯރުކޮށްދިނުމުގައި ހަރަކާތްތެރިވަމުން އަންނަ މެލޭޝިއާގެ ދެ ފިރިހެނަކު ވެސް ހިމެނެއެވެ.
