ދިވެހިންގެ އިހްސާސްތަކުގެ އަޑު އުފުލައި، ރާއްޖޭގެ ތަސައްވުރު ހާމަކުރުމަށް ޔޫއެންގައި އިސްކަންދެއްވާނެ ކަމުގައި ރައީސް މުއިއްޒު ވިދާޅުވެއްޖެއެވެ. މި ވާހަކަތައް ދެއްކެވީ ރާއްޖެ އދ ގެ މެންބަރަކަށްވީތާ 59 އަހަރު ފުރުމުގެ މުނާސަބަތުގައި ދެއްވި ޚިޠާބުގައެވެ.
ރައީސް ވިދާޅުވީ ރާއްޖެ މިނިވަންވުމާ ގުޅިގެން ބައިނަލްއަޤްވާމީ މުޖުތަމަޢުއާ ގުޅުން ބަދަހިކުރުމުގެ ފުރުޞަތު ލިބުނު ކަމަށާއި، އެއާއެކު އދ ގެ މެންބަރުކަން ހޯދުމަށް މަސައްކަތްކުރި ކަމަށެވެ. އަދި ގައުމެއްގެ މިނިވަންކަން ފުރިހަމަވަނީ ހަމައެކަނި މުއާހަދާއެއްގައި ސޮއިކުރުމަކުން ނޫން ކަމަށާއި، ރައްޔިތުން އެކަން ޤަބޫލުކުރުމުން ކަމަށް ވެސް ވިދާޅުވިއެވެ.
ރައީސް އިތުރަށް ވިދާޅުވީ ގައުމެއްގެ މިނިވަންކަން ބައިނަލްއަޤްވާމީ މައިދާނުގައި ދިފާޢުކުރެވޭނީ އެހެން ގައުމުތަކަށް އެކަން އަންގައިދީ، ގައުމުގެ ސިޔާދަތީ ބާރު އޮތްކަން ހާމަކޮށް، އެ ބާރަށް އެހެން ގައުމުތަކުގެ އިޙްތިރާމު ހޯދައިގެން ކަމަށެވެ. އދ ގެ މެންބަރުކަން ރާއްޖެއަށް މުހިންމުވަނީ ރާއްޖޭގެ މިނިވަންކަމާއި ސިޔާދަތު ދިފާޢުކުރުމުގެ މަސައްކަތް ކުރެވެނީ އދ ގައި ކަމަށް ވާތީ ކަމަށް ވެސް ވިދާޅުވިއެވެ.
ރައީސް ފާހަގަކުރެއްވި ގޮތުގައި އދ ގައި ރާއްޖެ ތަމްސީލުކުރެވުމުން ނިކަމެތިކަމުން އަރައިގަނެ، ފުދުންތެރި ގައުމަކަށް ވުމުގެ ބިންގާ އެޅިގެން ދިޔައެވެ. އަދި އދ ގައި ރާއްޖެއިން ވޭތުވެދިޔަ އަހަރުތަކުގައި ހޯދާފައިވާ ކާމިޔާބީތަކުގެ ތެރޭގައި އދ ގެ އާންމު މަޖިލީހުގެ ރައީސްކަން ލިބުމާއި، ހިއުމަން ރައިޓްސް ކައުންސިލްގެ މެންބަރުކަން ލިބުން ހިމެނޭ ކަމަށް ވިދާޅުވިއެވެ.
މިހާރު ރާއްޖެއިން ދަނީ އދ ގެ އިޤްތިޞާދީ އަދި އިޖްތިމާޢީ ކައުންސިލްގެ ގޮނޑިއަކަށް ވާދަކުރަމުން ކަމަށާއި، ރާއްޖޭގެ މިސްރާބު ހުރީ އދ ގައި އިތުރަށް ކުރިއަށް ދިއުމަށް ކަމަށް ރައީސް ވިދާޅުވިއެވެ. އަދި ގައުމުގެ ތަރައްޤީއަށް ބޭނުންވާ މަގުތައް ކޮށޭނީ ދުނިޔޭގައި އިޙްތިރާމު ލިބޭ ގައުމަކަށް ވެގެން ކަމަށާއި، އެކަން ވާނީ މިފަދަ މައިދާންތަކުގައި އަޑު އުފުލައިގެން ކަމަށް ވެސް ވިދާޅުވިއެވެ.
ރައީސް އދ ގެ އާންމު މަޖިލީހުގައި ބައިވެރިވެވަޑައިގަތުމަށް އެމެރިކާގެ ނިއުޔޯކަށް ކުރައްވާ ރަސްމީ ދަތުރުފުޅު ނިންމަވާލައްވާ ރާއްޖެ ވަޑައިގަންނަވާނީ މި މަހުގެ 29 ވަނަ ދުވަހުއެވެ. ރާއްޖެ އދ ގެ މެންބަރަކަށް ވީ 1965 ވަނަ އަހަރު ސެޕްޓެމްބަރު 21 ވަނަ ދުވަހު، މިނިވަންވިތާ 57 ދުވަސް ފަހުންނެވެ.
ކޮމެންޓު ފޮނުވާ