މާލޭ މަގުމަތިގައި ގިނަ ދުވަސްވެ، ބާ ވެފައި ހުރި އެއްގަމު އުޅަނދުތައް ނެގުމަށް މިއަދު ފެށި މަަސައްކަތުގައި ދުވަސް ނިމުނު އިރު މާލޭ މަގުމަތިން 200އަށް ވުރެ ގިނަ ސައިކަލު ނަގައިފި އެވެ.
މިއަދު ހެނދުނު 8 އިން ފެށިގެން މި މަސައްކަތް ކުރިއަށް ގެންދިޔައީ މާލެ ސިޓީ ކައުންސިލާއި ފުލުހުން ގުޅިގެންނެވެ. މާލެ ސިޓީ ކައުންސިލުން ދެންމެ 'އެކްސް’ގައި ކުރި ޕޯސްޓެއްގައި ބުނީ، މިއަދު ކުރި މަސައްކަތުން ނެގުނީ ޖުމުލަ 224 ސައިކަލު ކަމަށެވެ.
އޭގެ އިތުރުން، ސިޓީ ކައުންސިލުން މިއަދު ބުނެފައިވަނީ ޓޯ ކުރާ އުޅަނދުތައް ނިންމާނީ ފުލުހުން ކަމަށާއި، ކައުންސިލްގެ ދައުރަކީ މިކަމުގައި ފުލުހުންނަށް އެހީތެރިވުން ކަމަށެވެ. އަދި އުޅަނދުތައް ޓޯ ކުރުމަށް ފަހު، އެ އޮންނަ އުސޫލެއްގެ ދަށުން ވެރިފަރާތަށް ފުލުހުން އަންގާނެ ކަމަށްވެސް ބުނެފައިވެއެވެ.
މިދިޔަ ފެބްރުއަރީގައި ވެސް ޓްރާންސްޕޯޓު މިނިސްޓްރީން ވަނީ ސިޓީ ކައުންސިލާ އަދިވެސް ގުޅުން ހުރި އިދާރާތަކާ އެކު މިފަދަ ޕްރޮގްރާމެއް ހިންގައިފަ އެވެ. އޭރު 100އަށް ވުރެ ގިނަ އުޅަނދު ނަގާފައިވެ އެވެ.
