އެޑިއުކޭޝަން މިނިސްޓްރީން މަތީ ޘާނަވީ ދަރިވަރުންނަށް މުދައްރިސުން ތަމްރީނުކުރުމުގެ ޤައުމީ ޕްރޮގްރާމާ ބެހޭ މަޢުލޫމާތު ފޯރުކޮށްދީފިއެވެ. މިއަދު މިނިސްޓްރީން މި މަޢުލޫމާތު ދިނީ މާލެ އާއި ހުޅުމާލޭގެ ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީ.އެޗް.އެސް.އީ) ގެ ދަރިވަރުންނަށެވެ. އަދި ކުރިއަށް އޮތް ހަފްތާގައި އިތުރު މަތީ ޘާނަވީ ސްކޫލުތަކުގައިވެސް މިފަދަ ސެޝަންތައް ބޭއްވުމަށް ވަނީ ރޭވިފައެވެ.
މި ޕްރޮގްރާމްގެ މައިގަނޑު މަޤްޞަދަކީ ޘާނަވީ މަރުޙަލާ ނިންމާ ދަރިވަރުން މުދައްރިސްކަމުގެ ދާއިރާއަށް އަހުލުވެރިކޮށް، އެ ދާއިރާއަށް ޝައުޤުވެރިކަން އުފެއްދުމާއެކު، ފެންވަރު ރަނގަޅު ދިވެހި މުދައްރިސުން އުފެއްދުމެވެ. މިނިސްޓްރީން ބުނާ ގޮތުގައި މި ޕްރޮގްރާމްގެ ދަށުން ދަރިވަރުން ތަމްރީނުކުރުމުގައި އިސްކަންދޭނީ މުދައްރިސުން ލިބުން ދަތިވާ މާއްދާތަކަށާއި ރަށްތަކަށެވެ.
މި ޕްރޮގްރާމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެއްގެ ތެރެއިން އުފަންވި ޕްރޮގްރާމެކެވެ. އެއީ ރާއްޖޭގެ ސްކޫލުތަކުގައި ކިޔަވައިދޭ މުދައްރިސުންނަކީ ދިވެހިންނަށް ހެދުމަށްޓަކައި ޤައުމީ ފެންވަރުގައި މުދައްރިސުން ތަމްރީނުކުރުމުގެ ޕްރޮގްރާމެއް ތަޢާރަފުކުރުމެވެ.
